Shillong, Iaiong 10: Ki Pulit ka jylla kila pynmih ia ka jingbthah ba ki riewshimet ne ki kynhun kiba pdiang bad ai jaka sah ia ki briew kiba nabar ri kidei ban phah ia ki jingtip hapoh jong ka 24 kynta jong ka jingwan poi ka jongki.
Katkum ka jingpyntip u Superintendent of Police ka West Garo Hills u Abraham T Sangma, kine ki jingdonkam kidei kiba iadei bad ka Form-III, kaba la bthah hapoh jong ka Immigration and Foreigners Act, 2025 bad Rules, 2025.
“Kane ka sienjam ka long kaba kongsan bha ban pynthikna ba kidei ban bud ryntih bad ki kyndon ain jong ka ri India bad ban kyrshan ia ka jingpyrshang ka ri ban ai jingshngain ia ki nongshong shnong” la ong u Sangma.
Kane ka jingbthah kan treikam na ka bynta ki Hotel, Guest House, Lodge, Homestay, ki iingshong wai, skul, college, hospitals bad ia ki riewshimet kiba ai jaka sah ia ki briew kiba nabar ri. Ia ki jingtip dei ban aiti ne phah da kaba leh Online lyngba ka Bureau of Immigration portal.
“Kino kino kiba pulom ha kaban bud ryntih kin shah khring ha kaban shah pynshitom katkum ki kyndon ain bapher” la maham u SP.
La bthah ia ki nongshong shnong bad ia baroh kiba donbynta lang ha ka kam ba kin pynsaphriang lem salonsar ia kane ka jingtip ban pynthikna ba bun kin ioh ia ka jingpynsngewthuh bad ruh ba kin bud ryntih ia ki jingbthah.
Ki pulit kila banjur ia ka jingkongsan ban bud ryntih, da kaba pynpaw ia ka jingsngewkhia na ka bynta ka jingshngain jong ka ri. Kane ka jingbthah kadei shi bynta jong ka jingpyrkhing ia ka jingpdiang ia ki briew kiba wan nabar ri hapoh jongka West Garo Hills district.
