Shillong, K’Lyngkot 12: U national vice president ka National People’s Party (NPP) bah Prestone Tynsong u ba dei ruh Symbud Myntri Rangbah ka jylla ula kyntu iaki paidbah ka Meghalaya ba kim dei ban beij iaka song pisa ba T.1000 ba la kular ka All India Trinamool Congress.
Haba kren ha ka jingialang jong ka NPP kaba la long ha madan Polo, u bah Prestone ula ong ba kane ka jingthong ka AITC daka song pisa ba T.1000 iaki longkmie bad iaki samla lyngba ka WE Card skhim kadei tang ka buit ilekshon bad la thikna ba kane ka party kan nym lah da lei lei ruh ban thaw sorkar ha Meghalaya.
“Ka AITC ka kular ban ai T.1000 sha ki longkmie bad samla lada ka ioh ban thaw sorkar bad nga kum u kpa ka ïng ngan nym shah iala ka kurim ban shim ia kane ka song pisa ba tang T.1000 namar kane ka long kaba jem daw” la ong u bah Prestone.
U bah Prestone ula ong ba lada kane ka Party AITC ka sngewkhia shisha iaki longïng baduk hapoh Meghalaya kam dei ban ap haduh da kut ilekshon hynrei kadei ban pyllait noh mar dor ia kane ka song pisa sha kito kiba la pynrung kyrteng.
U la ong ba ka khliehduh ka AITC ka Mamata Banerjee kaba dei ruh ka myntri rangbah jylla West Bengal kala synshar ia kane ka jylla da ki phew snem bad lada ka sngewkhia shisha iaki paidbah Meghalaya kadei ban kit lut iaka pisa ba ka don ban sam sha ki paidbah mynta hi, ymdei ban ap tang iaka por ilekshon.
“Nga kyntu iaki paidbah ba kim dei ban beij hynrei kidei ban long kiba stad ban kyntait mardor ia kane ka song pisa ba tang T.1000 ba kthong daka AITC” la bynrap u bah Prestone.
