Dibrugarh, Nailur 28 : Ka Assam Jatiya Parishad (AJP), hynnin ka sngi ba Ar kala kynnoh ia ka sorkar BJP ha ka jylla halor ka jingpyrshang ban die duh ia ka Brahmaputra Valley Fertilizer Company Limited (BVFCL).
Haba aijingkren sha ki lad pathai khubor ha Dibrugarh, u president ka AJP, u Lurinjyoti Gogoi ula ong, “Ka sorkar BJP kala pyrshang ban die duh ia ka kompeni BVFCL.Ka sorkar kala kut jingmut na ka bynta ban thaw sa ia ka bynta kaba saw jong katei ka karkhana ha Namrup, hynrei tad haduh mynta kam pat shym la leh ei ei ruh.Mynta, ban pynduna ia ki kam bei tyngka, na ka liang ka sorkar kala thmu syndon ban dei duh noh ia ka kompeni BVFCL sha ki kynhun shimet.”
“Hadien kiba bun ki jingpynthikna, na ka liang ka sorkar kala pulom ban thaw ia ka unit kaba saw jong kane ka kompeni BVFCL.Ha u 2018, ka sorkar pdeng kala mynjur ia ka jingtyrwa na ka bynta ban thaw sa ia ka unit kaba saw jong kane ka kompeni ha ka jinglut kaban kot haduh T.4500 klur.Hynrei haduh mynta ym pat shym la iohi dak ei ei ruh,” ong utei u heh ka Assam Jatiya Parishad.
“Ka kompeni ia kaba shisien la sakhi kum kawei na ki kompeni pynmih sboh kaba bha tam bad kaba wanrah ka jingioh nong kaba jur hapoh ka ri, mynta kane ka kompeni BVFCL ia kaba la sdang naduh ka snem 1969 kala don hapdeng ka jingiaksaid namar ka jinghiar ha ka jingpynmih sboh naduh kine ki khyndiat snem kiba la dep,” ong u Gogoi.
“Ki nongrep slasha kiba kham rit ki dei u budlum jong ka karkhana slasha hapoh Assam.Kine kila pynmih haduh 50% u slasha hapoh Assam.Hynrei na ka liang ka sorkar kala pulom ban buh beit ia ka dor ka mur kaba biang na ka bynta u slasha,” ong shuh shuh u Gogoi.
Shuh shuh ula ong ruh ba ka Dibrugarh kaba dei ka sor rit kaba la rim bha jong ka Assam, hynrei ki kam pynroi hapoh kane ka sor rit ki iaid suki haba ianujor bad kiwei kiwei pat ki district ka jylla.
“Ka Dibrugarh ka dei ka thain kaba wanrah bun ki jingmih na ka bynta ka sorkar hapoh Assam pynban kala shah iehnoh bein ha baroh ki liang,” ong shuh shuh utei u nongialam ka AJP.
