Shillong, Nailur 28 : Ka Chairperson ka National Commission for Women (NCW) Rekha Sharma, kala ban jur ba donkam ban pyrkhat ia ki sienjam ba thymmai ban tehlakam, iada ban pynsajia halor ki kam khaii ia ki kynthei ha ka thain Shatei Lam Mihngi.
Ka Rekha kala kren ia kane ha ka jingialang jong ka Regional Level Consultation halor ka mat “Combating Human Trafficking in NER” (ban iakhun ia ka kam khaii briew ha ka thain Shatei Lam Mihngi) kaba long hynne ka sngi ha North Eastern Council, Auditorium, Shillong.
Ka Rekha kala iaroh ia ka jinglong jingman ki Kynthei hapoh ka thain Shatei Lam Mihngi bad ka jinglong hakhmat ha kiba bun ki kam ki jam ban ia ki shynrang.
Hynrei kane ka Heh ka National Commission kala ban jur ba donkam ban pyrkhat ia ki sienjam ba thymmai ban tehlakam, iada bad pynsajia halor ki kam khaii ia ki kynthei ha kane ka thain naba ka thain ka dei kaba iasam ia u khappud bad ki Ri kum ka Bangladesh, Nepal, Myanmar, kaba la kylla long kum ka lynti iaid.
Halor ka kam ban iakhun pyrshah ia ka kam khaii briew, ka Rekha kala ong ba ka NCW ha ryngkat ki State Commission ki lah ban shim ia ka bynta kaba khraw bha ha ka ban thawlad ia ka ioh kam ioh jam, ban pynsngewthuh ia ki khynnah kynthei ha ki skul bad College bad ban pynlong ia ki jingialang ba man ka por bad ki kynhun bapher bapher ban shong bishar ia ki jingtynjuh kiba don hakhmat.
Ia kane ka jingialang iasyllok la pynlong ha ryngkat bad ka Meghalaya State Women Commission (MSWC) bad ka thong jong ka, ka long eh ban pynjanai ia ka rukom tehkakam ia ki kam khaii briew, ban pynsngewthuh hapdeng ki kynthei bad ki Khynnah Kynthei, ban ai jinghikai ia ki Anti Trafficking Unit bad ban pynkhlain bad pynsngewthuh ia ki bor ka Ain.
Kiwei pat kiba la kren ha ka jingialang ki kynthup ia I kong Phidalia Toi, Chairperson, Meghalaya State Commission for Women bad Bah C.H Kharshiing, Planning Advisor, North Eastern Council.
