Guwahati, Nailur 28 : Ki bor pulit ka East Guwahati hynnin ka sngi ba Ar kila ioh ban kem noh ia uwei u briew ha ryngkat kawei ka kynja niangbashiah (Gecko) ba phylla na ki bynta jong ka Basistha.
La ioh kem noh ia une u briew hadien ba la ioh ia ka jingtip kaba thikna halor ka jingpyrshang ban khaii beain ia ki mrad khlaw.Ia une u briew la tip kyrteng kum u Pranab Ranghang.
Ia une u briew kumjuh ia kane ka kynja niangbashiah la aiti noh sha ka tnat Forest ban leh ia kaba donkam.
Lah ban kdew ba ia kine ki kynja khniang bad khamtam ki Tokay Geckos la ju khaii beain na ki daw kiba kongsan, kata kaba kynthup halor ki jingmyntoi na kaba shna dawai dashin kumba la ngeit da kiba bun.
La ngeit ruh ba ka kynja um ne snam jong kine ki Gecko ki dei kiba kongsan bha ha kaba aijingsumar ia kiba pang bampong (cancer) bad ia kane la kham pyndonkam bha ha kiba bun ki bynta jong ka ri China.
Ka dor jong kine ki khniang la ong ba ka kot da ki bun lak tyngka tang na ka bynta kawei.Watla katta kam pat shym la don satia kano kano ka jingpynshisha lyngba ka juk stad saian ba ka kynja um ne snam jong kine ki Gecko ki lah ban pynjem ia ki jingpang jingshitom.
