Thmu ka Sorkar ban wanrah ia ka buit hikai da kaba shu pynialehkai ia ki Khynnah

Tura, K’lyngkot 28: U Myntri Rangbah ka jylla Conrad K. Sangma hynne ka sngi Nyngkong ula ong ba ka sorkar kan sa wanrah ia ka rukom ai jinghikai da kaba shu pynialehkai ne ka ‘Game Based Learning’ na ka bynta ki khynnah ha ka jylla.
Haba plie ia ka Model Creative Learning Centre (MCLC) ha Dobakkol ha Tura, ula ong, “Ka long kaba kongsan ba ia ki khynnah dei ban pynithuh ia ki jingai jinghikai da kaba shu pynialehkai (Game Based Learning) kaban iarap ia ki ban tei ia ka jingmut, ban ithuh bad ban don ia ka sap ka phong kaba lah ban tehkyndon hi dalade”.
Ula pyntip ba lyngba ka Early Childhood Development (ECD) mission, yn sa tei ia ki jaka pule na ka bynta ki khynnah ha kylleng jong ka jylla.
Ula iaroh ia ka Mere Mentor bad Dobakkol Non Govt L.P. School kaba la iatreilang ban sdang ia ka MCLC, u Myntri Rangbah ula ong, “Ka sorkar jylla kala bei tyngka naka bynta ki jingtei hynei kan dei pat ka jingshim lang ia ka jingkitkhlieh ong ka kynhun ban pynthikna ba kan long kaba treikam pura”.
La bhah tyngka ban pynlut T.50 lak na ka bynta ka projek hapoh jongka Chief Minister’s Special Development Fund (CMSDF). Kadei ka projek kaba dang shu sdang nyngkong kaba la maitphang da u Myntri Rangbah ban kyntiew ia ki kam bad ia ka Game Based Learning.
Haba pyntip shaphang ka ECD mission, ula ong, “Ka long kaba kongsan ban gin ai ia kaba bha tam ia ki khynnah bad ha ka lynti kaba long da ka jingstad saian. Naduh ba dang kha haduh ka 8 snem ka rta, u khynnah u iaid sted ha ki jingkylla ki bapher ha ka jingim bad dei ha katei ka por ba donkam ban ai ia ka jinghikai kaba dei bad kaba paka kaban ailad iaka bor pyrkhat ka jongki ban tei ia ka sap ka phong, ban long kiba shemphang bad kiban don ia ka sap ban lah ban pynbeit ruhia ki jingeh”.
Ula pyntip ba ka sorkar kala shim ia ki jingai jinghikai ha ka ECD na ki ri kiba don ha ka dewbah Europe bad ka ri Bilat kala pynwandur iala ka jong ka rukom treikam.
“Ngi lah pyniaid ia ka scheme bad ngi sa nang kyntiew shuh shuh ia ki Anganwadi ki jong ngi kum ki Anganwadi kiba stad”, ula bynrap.
Ha ka shnong Dura Asim kaba hap hapoh ka Chokpot Block ha South Garo Hills, ka Mere Mentor kala buh ia ka Learning Centre da kaba kyntiew ia ka Aganwadi bad kane ka projek kala treikam mynta la ar snem tam.
Ka jingthmu jong kane ka jaka pule ka long ban ai ia ka jingshngain, ka jingpdiang sngewbha bad ban ai ia ka rynsan kaba pynshlur ia ki khynnah ba kin iit bad nang lyngba ka jingialehkai, ban pynlong ia ka jingpule kaba sngewtynnad bad kaba don ia ka jingiasyllok.
“Ka projek ka pynleit jingmut ha ka jingpule kaba iadei bad ka imlang sahlang bad ka jingiatreilang kaban lah ban iarap ha kaban tei ia ka jingiadei kaba khlain hapdeng ki skul, ki longiing longsem bad ka imlang sahlang, kaban lam sha ka jingpule kaba kham sngewtynnad bad kaba shong nongrim bha” la ong u Sourav Kumar, u Nongseng jongka Mere Mentor.