Shillong, Rymphang 06: Ka Sorkar Jylla ka don jingthmu ban shna noh da ka Park kaba janai bha ha Golflink ban ai jaka ia ki paid nong Shillong ba kin ioh iaid pynjahthait bad pyn pynngad ialade manla ka sngi.
Kane ka park ka dei kaban tei ha ka jinglut kaba kot T.16 klur ha ka jaka jong ka Tnad Urban Affairs. Kane ka park kan don ruh ia ka Cycling Track nalor kiwei kiwei ki jingpyn byrngia. Kala mih ruh ka jingtyrwa ban shna ia ka madan ialehkai Futsal bad ban buh ia ka Iew Nongrep ha syndah jong ka.
Ia kane la pyntip da u Myntri Sorkar Bah A.L.Hek hadien ka jingialang bad ki Heh Ophisar ka Tnad Urban Affairs lem bad ki Nongialam Shnong ka Pynthorumkhrah Golflink, kaba long hynnin ka sngi Ba-ar ha Secretariat.
Haba iakren bad u Bah Hek uba dei ruh u MLA ka Pynthorumkhrah, ula iathuh ba ia kane ka park yn khmih bad sumar da ka Dorbar Shnong Pynthorumkhrah Golflink, ka ban lum da ka pisa bai rung ia ki paidbah ban lah wanrah ia ka jingshngain bad ka jingkhuid jingsuba jong kane ka jaka iaid kai pynngad.
U pyntip ba ha kane ka jingialang, ka Tnad Urban Affairs kala mynjur ban aiti sha ka Dorbar Shnong ba kan pyniaid ia kane ka park ynda la dep tei ia ka bad ba kan thepkam ruh da ki samla Shnong ki ban sumar ia kane ka park.
“Ka jingthmu ban tei iaka Park ha Golflink, kan wanrah ia ka roi ka par ha ka shnong baroh kawei, kumta ma nga bad ka Dorbar Shnong, ngi ieng ha ka nongrim ba ka Dorbar Shnong kan pyniaid ia kane ka park bad ban thepkam ruh da ki samla shnong” ong u Bah AL Hek.
Na ka liang u Rangbah Shnong ka Pynthorumkhrah Golflink u Bah Micheal Hek ula ong, ba ka shnong ka long kaba donbok ban ioh ia ka Park khamtam haba ki samla shnong ruh kin iohkam iohjam bad ka shnong ruh kan ioh iaka jingiarap ha ka liang ka pisa.
Ula iathuh ba ka Shnong kam don ia kano kano ka jingpyrshah bad na ka liang u Myntri Sorkar u Bah AL Hek bad u Director ka tnad Urban Affairs u Bah E Kharmalki, kila ai ka jingkular ban aiti sha ka shnong ban pyniaid bad ban khmih ia katei ka park.
