Shillong, Jymmang 09 : U Myntri ka Tnad Social Welfare Bah Paul Lyngdoh ha ka sngi Thohdieng, ula pynbna ba palat 100 ngut ki nonghikai kila pynkhreh ban ioh jinghikai ba kin long ki ‘Counsellor’ hapoh ka 10 bnai, ba kin iasyllok bad ban weng ia ka jingma jong u droks na ka jingim ki khynnah pule naduh ba ki dang rit.
Haba kren sha ki lad pathai khubor, u Bah Paul ula ong ba ka Sorkar lyngba ka Tnad Social Welfare kala shim ia baroh ki sienjam ha ka jingpyrshang jong ka ban tehlakam bad pynduhjait ia u droks bad ka jingkynrei ka kam khaii droks hapoh ka Jylla Meghalaya.
“Ngi la shim ïa ka rukom treikam kaba bun rukom kaba dang sei soh mynta kumba nga la pynpaw ha phi ha ka sien kaba la dep, ba ka jingdih droks ka la hiar kumba 20 percent hynrei kane kam mut ba ngi shongthait noh da kane ka jingjop,” u la bynrap.
Haba pynpaw ba ka tnad kala kut jingmut ban nang pynkhlaiñ shuh shuh ïa ka jingpyrshang jong ka ban tehlakam ïa ka jingjyllei jong u drok, u Bah Paul la ong, “Kawei na ki sienjam ba kongsan kaba ngi la shim mynta ka long ba ngin sdang da kaba pynbiang bad weng ïa kane ka jingma naduh ka rta ba dang lung kaba mut ba ngim ym shah, ngin pyrshang ban ym shah ïa ki samla lud jong ngi ba kin ngop ha ka jingdih droks.”
Ula bynrap “ Halor kane, ka DREAM Mission dang shen kala iatreilang bad ka Sanker Centre for Neirology & Mental Health bad ngin ym jied ia ki jingai jinghikai kiba ka Sanker kala pyniaid, ha kaba ki Nonghikai kin ioh ia ki jinghikai kumno ban iasyllok ia ki kynnah pule naduh klas II haduh V, khnang ba ki khynnah kin sngewthuh ia ka jingdonkam ban kiar na une u jingdih buaid”.
Ula pynbna ruh ba ka Sorkar Jylla kan beit haduh 50% ia ka jinglut jingsep ha ka jingpule, kaba long T.10,000 bad ong “ Kane ka dei ka sienjam kaba khraw ba ka Sorkar kala bei tyngka ia ki Nonghikai, ki ban long kum ki nongiasyllok naba ngin ym lah ban lum lang shi jaka ia ki Khynnah skul, kumta ngin ai jinghikai ia ki nonghikai kiban long ki nongiasyllok hala ki jong ki skul”.
Nalor kane, u Myntri u pyntip ba kawei pat ka sienjam ka long ba kawei na ki Club Phutbol bah eh ka Jylla-ka Shillong Lajong FC kala iatreilang bad ka Tnad ban ialap pyrshah ia ka jingniew bein ia kiba dih droks bad ban kren ban khana ia ki samla ka Jylla.
Kawei pat na ki sienjam bala shim ka long ba ka Tnad kala phaikhmat bha sha ka jingai jinghikai ha ka Vocational & Skill Development ia kiba dih droks.
“Ngi la shem ba kane ka buit treikam ka dei kaba jop haba phai sha ka jingkhring pat ia kito kiba la ngop ha u droks. Ki jingai jinghikai kila iaid ha New Hope Deaddiction Centre na ka bynta ki nongdih droks bad shynrang bad khynthei. Ngi la iatreilang ruh bad ka MSSDS, Don Bosco, ITI bad ngi la tyrwa ban ai jinghikai ha ka Plumbing, Food Processing, Mobile Repair, Photography bad kiwei kiwei” bynrap u Bah Paul.
U Director ka DREAM Bah Francis Kharshiing ula ong ba ki skul la pynshlur ba kin jied ia iwei I nonghikai ban phah sha kane ka jingai jinghikai ba kin long ki Counsellor.
“Ka course ka long tang ia 10 ngut ki nonghikai ha ka shibnai. Kan sa nang kiew. Ha ka 10 bnai, ngin sa ai jinghikai ia palat 100 ngut ki nonghikai. Ka jingthmu hi ka long ba ki nonghikai bala pyntbit ki lah ban pynsngewthuh bha ia ki khynnah” ula ong.
