Shillong, Jylliew 26: Ka tnat Social Welfare ka Sorkar Meghalaya ka dang iakren bad ka Ministry ka Sorkar Pdeng ban mang tyngka naka bynta ban iarap pisa iaki Dorbar Shnong ba kin thaw bad pynim iaki Village Defence Party (VDP) ban iakhun pyrshah ia u droks.
Kane ka jingthmu ban iarap pisa iaki Dorbar Shnong kadei naka bynta ban iakhun pynduh jait ia u Drok hapoh ka Jylla Meghalaya baroh kawei.
U Myntri ula pyntip ia kane hadien ba dep ai jingkren ha ka multi-stakeholder symposium bala pynlong hapoh ka Drug Reduction Elimination & Action Mission (DREAM) ban rakhe ia ka International Day against Drug Abuse and Illicit Trafficking hynne ka sngi Balang.
U Myntri ula ong ba ka Sorkar ka kwah ba ki Dorbar Shnong kin pyntreikam bad pynkhlain iaki VDP ba kin iatreilang bad ki bor Sorkar ban rat dkhong ia u drok napoh ka Jylla.
“Ki don tang 11 tylli ki VDP hapoh ki shnong ka sor Shillong kiba dang treikam bad kiba dang khlain haduh mynta hynrei ki don bun ki shnong ki bym pat don VDP bad ngi khmih lynti ba kin sa thaw noh ia la ki VDP ki ban long kat kum ka ain” ula ong.
U Myntri u pyntip ba ka jingthaw bad pynim pat ia ki VDP kan sa sdang noh shem hadien ba ka Sorkar kala lum lut ia baroh ki jingai jingmut na ki Dorbar Shnong haba iadei bad ka Ain kaba khmih ia ka jingthaw ia ki VDP.
“Ngin sa ioh lut ia baroh ki jingai jingmut hashuwa ban kut une u bnai ba mynta” ula ong.
U Myntri ula pyntip ba hadien bala ioh pdiang iaki jingai jingmut naki Dorbar Shnong, ka tnat Social Welfare kan sa thoh bad iakren bad ka Sorkar Pdeng haba iadei bad ka jingmang tyngka ban iarap iaki Dorbar Shnong hapoh ka Jylla.
 ban iakhun pyrshah ia u droks.){kind=link}