Nongpoh, Nailur 27 : Ka jingiakop khwai dohkha ha RRTC Umran ba pynlong hynne ka sngi Balang, kala poi sha ka jingkulmar hadien ka jingsuba lehthok jong uwei u rawon uba khwai da ka dohkha iap ba shu wanrah na shabar tang ban ioh ia ka khusnam ba T.10 lak ba nyngkong.
Da ki hajar ngut ki rawon kila leit sha kane ka jingiakop khwai dohkha kaba la tyrwa ia ka song khusnam kaba khring-kaba long T.10 lak ia uba nyngkong, T. 4 lak ia uba wan ba-ar bad T. 2 lak ia uba lai nalor kiwei kiwei ki khusnam.
Kane ka jingiakop khwai kala sdang naduh ka por 9 baje mynstep bad ki rawon kila ia am khui ban iasei dohkha na kane ka pung hynrei hapdeng ka jingiakhun, uwei u rawon ula leit rah bad phah thew da ka dohkha kaba la iap bala pynsuba jur ia ki para rawon ba ka dei ka dohkha ba shu wanrah na shabar.
Ki rawon kiba lap ia kane, kila ieng pyrshah ban thew ia kane ka dokha haba kynnoh ruh ba kane ka jinglehtuh une u rawon ka lah ban don eiei ha lyndet bad ki nongpyniaid ia ka jingiakop.
Ka huri hura kala poi ruh sha u pud ba ki rawon kila sdang ban ktah kti ia utei u rawon ba suba leh thok bad kumjuh ruh ia ki nongpyniaid kiba pyrshang ban iada ia une u rawon. Ki nongpyniaid kila tan noh mar mar ia une u rawon ba suba leh thok sha Iingdorbar bad phet krad noh ialade na kane ka jaka.
Haba ioh jingtip ia kane ka jingjia, ki Pulit ka Umsning Police Station, kila hiar mar mar sha katei ka jaka bad kila rah noh mardor ia une u rawon ba suba leh thok ba un lait na ka jingmynsaw.
Ki Pulit ki iathuh ba ha ka jingtohkit, une u rawon ula phla ba ula leh thok ha kane ka jingiakop khwai bad ba u shu wanrah na shabar ia ka dohkha ha ka jingiasuhbuit lang bad ki paralok khnang ban ioh rah ia ka nam jop bad ioh ia ki song khusnam jong ka jingiakop.
Namar kane ka jingkulmar, ki rawon kiba leit iashimbynta, kila dawa ia ki nongpyniaid ba ki dei ban pynphai lut noh ia baroh ka pisa bai ticket kaba long ha ka dor T. 2000 kawei.
Kat haduh ba thoh ia kane ka khubor, ki nongpyniaid kim pat lah satia ban iapynbeit ia ka jingdawa pynphai noh ia ka pisa bai ticket bad ki rawon ruh ki dang ap beit khui ha katei ka pung.
