Shillong, Jymmang 22 : U Myntri ka Tnad Disaster Management Bah Kyrmen Shylla ula kynthoh tyngeh ba ka Assam ka donkam ban shna pynbha shuwa iala ki jong ki nala ha Guwahati ha ka jaka ban kynnoh ia ka Meghalaya halor ka jingshlei um dang shen ha Guwahati.
Kane ka jingkynthoh kala mih hadien ba u Myntri Rangbah ka Assam Himanta Biswa Sarma, ula kynnoh ba ka jingpom dieng bad jingtih ia ki lum ha Meghalaya ban tei jingtei, ka dei ka daw bah kaba la nang pynjur ia ka jingshlei um hapoh ka Nongbah jong ka Jylla Assam.
“Ki hap ban wad ia ka lad ka lynti, shna ia ki nala ba bha ban lait na ka jingshlei um. Tad hadien ba leh ia kane, kam don jingmut ban kynnoh ia ka Meghalaya” ong u Bah Kyrmen. Ula ban jur ba ka jingshlei um ha Guwahati ka dei ka kam kaba la slem bha kaba hap ban leh eiei da kaba plan bad shna ia ki jingtei kiba donkam hapoh Assam hi.
U Bah Kyrmen ula pynshai ruh ba ka Meghalaya kam pat ju ioh ia kano kano ka jingthoh ne don ka jingiakren bad ka Assam halor kane ka kam. “Haduh mynta, ngim pat ioh satia ia kano kano ka jingthoh na Assam ba ong ba ka Meghalaya ka dei ka daw jong ka jingshlei um ha Guwahati” ula ong.
Ula kyntu ia ka Assam ba kan leh ia ka survey kaba thikna hashuwa ban pynmih ia kano kano ka jingkynnoh. “Shuwa ban kynnoh, da leh shuwa ia ka survey ba thikna. Bad wat lada ka um ka tuid nangne, ka dei ka namar ka mariang namar ka Meghalaya ka dei kaba ioh buneh u slap” ula batai.
U Bah Kyrmen ula ong ba ka Meghalaya ka long kaba kloi ban iakren bad kloi ruh ban shim ia ki sienjam ban pynbeit lad aka Assam ka lah ban ai ia ki sakhi ba shlei um namar ka Meghalaya. “Ka long kaba suk ban kynnoh hynrei kine ki jingkynnoh ki dei ban don bad ki sakhi. Lad aka survey ka pyni ba dei ma ngi, ngi long kiba kloi ban iakren bad shim ia ki sienjam ban leh eiei. Hynrei dei ruh ban sngewthuh ia ka mariang-haba phi don ha ka jaka lum, ka um kan tuid beit sha ki jaka them”.
Ula pyni nuksa ruh ia ka jingjia aksiden kali bad ong “Lada phi aksiden kali namar ka jingniah sted, phim lah ban kynnoh ia ka surok. Phi hap ban niah phikir bha bad don ia ka jingkitkhlieh”.
Ka Sorkar Jylla kala ban jur ia ka jinglong ba kloi ban iatreilang hynrei ka buh pat ia ka kyndon ba kano kano ka jingiakren halor kane ka kam ka dei ban long halor ki jingshisha bad ki sakhi satar, ym ka jingkynnoh paidbah.
