Shillong, Feb 21: U Symbud Myntri Rangbah ka jylla u Bah Prestone Tynsong ula ther tyngeh iaka seng BJP halor ka jingpynslem ban ai jingmynjur ban pyntreikam noh iaka Inner Line Permit (ILP) ha ka jylla bad ula ong, ba ka BJP kaba don haka jylla bad ha ka sorkar pdeng, kala leh politik ia kane ka mat jingdawa.
“Ka long kaba sngewthamula ban iohi ha ka mat treikam jong ka BJP, ba kawei na ki mat jong ki kadei ka ILP. Ngi la mynjur iaka Resolution ha u snem 2019 bad ngi la phah sha ka sorkar pdeng bad ngi la leit ruh sha Delhi, da ka kynhun hapoh ka jingialam u Myntri Rangbah, hynrei ka BJP kam shym la shimkhia eiei ia kane ka mat ne wat iaka jingdawa ha kaba iadei bad ka ktien Khasi bad Garo” ong u Bah Prestone Tynsong.
U la ong, haba ka elekshon kala wan, ka BJP kala pynpaw iaka jingkloi ban shimkhia ia kine ki ar tylli ki mat kaba ki paidbah ka jylla kila dawa la bun snem.
“Kane kadei tang ka jingleh politik ka jong ki (BJP) ha ka por elekshon. Ha ka jingshisha, ym tang iaka ILP ne ka jingdawa ban pynrung iaka ktien Khasi bad Garo ha ka Eight Scheduled jong ka riti synshar ka ri hynrei ngi la shimkhia ruh ban tynruh ha kaba iadei bad ka mat jong ka jingpynkylla iaka Meghalata Residents Safety and Security Act bad kane ruh ka dang sahkut mynta haka Ministry of Home Affairs” ong u Bah Prestone.
Ula ong, kane ka jingpynslem khnang ka pyni ba ka BJP kam don iaka jingsngewkhia iaka jingdawa u paidbah ia kane ka mat kaba kongsan naka bynta ka bha ka miat jong u paidbah ka jylla.
U Bah Prestone ula kyntu ia ki nongshong shnong ka jylla ba kin shaniah skhem haka NPP namar ba kadei tang kane ka seng kaba nud ban shim ia ki ishu kiba kongsan kaba kiwei pat ki seng kim nud satia ban shim.
Ula ong, ym shim la don kino kino ki seng kiban shimkhia iaka ILP ne ka jingdawa pynrung iaka ktien Khasi bad Garo haka Eight Scheduled.
“Ngam pat iohi bay n don kiban wanrah ia kano kano ka Resolution halor kitei ki mar, hynrei kadei tang ka sorkar MDA kaba ialam da ka NPP bad ngi skhem jingmut ba ngin iai buddien beit halor kitei ki mat bad ka sorkar India” ong u Bah Prestone.
Lah ban ong, ki nongialam ka BJP kiba na ka seng kmie ne na kane ka jylla, kila kam ba lada ki paidbah ki pynjop haduh 31 ngut ki kyrtong ka BJP ha ka elekshon, ki long kiba kloi ban pynurlong ia ki mat jingdawa kiba sahteng jong ka jylla.
