Shillong, K’lyngkot 22: U Nongialam ka Indian National Congress (INC) Rahul Gandhi u la ther tyngeh ia ka Sorkar National Democratic Alliance (NDA) ba lamkhmat da ka BJP halor ka jingsngap man man ia ki jingdawa jong ki paidbah ka Jylla Meghalaya.
U Rahul Gandhi ula kynthoh ia kane haka rally ‘Bharat Jodo Nyay Yatra’ kaba long hynne ka sngi ha madan Paham Syiem, Nongpoh ha ka jingiadonlang ki Nongialam ka Congress na Delhi bad ki Nongialam ka Meghalaya Pradesh Congress Committee (MPCC).
Ka Bharat Jado Nyay Yatra u Rahul Gandhi kala wanpoi hynne ka janmiet ha Nongpoh, Ri-Bhoi District ban ialap ia ka jingthmu jong kane ka rally sha ki nongshongshnong ka Jylla.
La pdiang sngewbha ia u Rahul Gandhi ha Jorabat da u MP ka jylla Meghalaya bad u nongialam ka MPCC Ma Vincent H Pala ha ryngkat kiwei kiwei ki heh nongialam ka party Congress ka jylla Meghalaya.
Hadien ba la poi ha Nongpoh, u Rahul Gandhi lem bad ka kynhun ki la mih ban iaid kjat kumba 1 kilometer ban poi sha ka madan Pahamsyiem, kaba la pynbeit ban pynlong ia ka jingialang paidbah.
Haba ai jingkren, u Rahul Gandhi ula kynthoh ba ka Sorkar NDA ba ialam da ka BJP, kala shu peit ibein ia ka Jylla Meghalaya bad kala sngap man man ia ki jingdawa ka Jylla khamtam ka jingpynrung noh ia ka ktien Khasi bad Garo ha ka khyrnit ba phra ka Riti Synshar ka Ri bad kiwei kiwei ki jingdawa. “Ngi iohi ba ka Sorkar BJP kala shu pynbiej jubor da kumne kumtai ia ki paidbah ka Jylla Meghalaya” ong u Rahul.
U Rahul u la ther tyngeh ia ka jingsynshar bym khuid ka Sorkar BJP bad ka jingniew shilliang ruh ia ka jingsngew jong u paidbah ka ri hi baroh kawei, kawei na ki nuksa kiba dang jia shen ka dei ka jingjia ia umsnam hapoh ka jylla Manipur ha kaba da ki spah tylli ki mynsiem briew ki la duh ei bad ka jingduh ruh ia ki jingdon jingem ha kane ka jylla hynrei kaba lyngngoh ka long ba u Myntri Rangbah Duh ka Ri u Narendra Modi haduh mynta um pat leit jngoh ne kren eiei halor kane ka jingjia umsnam.
Haba kren halor ka Bharat Jodo Nyay Yatra, u Rahul ula ong ba kum u nongialam paidbah ha ka ri, u la sdang ia kane ka jingiaid kjat da ki phew hajar kilometre, kaba u la sdang naduh Kanyakumari terter sha Kashmir bad ban poi sha kiwei kiwei pat ki jylla. Ula ong baka jingthmu jong ka rally ka long ban wanrah ia ka jingiaieid, iatylli bad ban pynsngewthuh paidbah halor ka jingshah khniot bein ka jingsngew bad ka jingangnud jong u paidbah ha ka sorkar India kaba lamkhmat da ka BJP.
U la ong ruh ba ka BJP bad ka RSS ki la wanrah ia shibun ki jingklumar bad ki jingjia kiba shyrkhei hapoh ka ri India ha kaba lah ban kdew ruh, ba ka thain shatei lam mihngi (North Eastern States) kiba kynthup ia ka Meghalaya, ka Manipur bad Arunachal ki dei ki jylla kiba la shah peitkhmat bha ha kine ki ar kynhun ban pyntroin ia ka jingsynshar ba laitluid jong ki paidbah bad khamtam ha ka jingngeit niam ka jong ki.
