Shillong, K’Lyngkot 25: U MLA barim ka seng Congress na Mawlai constituency bah P.T Sawkmie u ban iakhun noh ia kane ka elekshon ban wan naka United Democratic Party (UDP), ula ther tyngeh iaka All India Trinamool Congress (AITC) halor ka jingkyntiat ban bsuh lang iaka jingdawa pyntreikam ia ka Inner Liner Permit (ILP) ha ka Manifesto jong ka Party.
“Ka long ka jingsngewsih ban iohi ba wat ka ilekshon kam pat sdang hynrei ka AITC kala sdang ban kylla rong. Haka jingwan iuhkjat ka nongialam ba rangbah jong kane ka Party, ka AITC kala kular ban dawa naka sorkar pdeng ban pyntreikam ILP ha Meghalaya hynrei mynta ka kynti kane ka Party ka khlem bsuh lang iaka ILP hapoh ka Manifesto” la ong u bah P.T Sawkmie.
U bah P.T Sawkmie ula pynkynmaw ruh ba naka liang u Dr. Mukul Sangma haka por ba u bat kum u Myntri Rangbah ka jylla, ula kyntait mardor iaka jingdawa pyntreikam ILP ha Meghalaya.
“Mynta ka kynti u Dr. Mukul uba la don bad ka AITC ula wanrah biang ia ka mat ban pyntreikam noh iaka Meghalaya Residents Safety Security Act (MRSSA) kaba donkam hynrei kumba ka long mynta ka ILP ka kham donkam bha ban iaka MRSSA” ula ong.
U bah P.T Sawkmie ula kynnoh ba ka Myntri Rangbah jylla West Bengal kala kren shai ha ka jingialang ha Meghalaya ba lada ka Party ka wan ha ka bor, kan dawa naka sorkar pdeng ban pyntreikam iaka ILP hynrei baroh ki tip ba AITC kan nym wan ha ka bor ha Meghalaya.
Nalor kane u bah P.T Sawkmie ula kynnoh ruh ba ka jingslem ka sorkar pdeng ban pyntreikam iaka ILP ha Meghalaya kadei ruh namar ka jingbym shimkhia ka sorkar jylla ha ka jingialam ka National People’s Party (NPP).
Ula kynnoh ruh ba ka NPP kam shim khia haba iadei bad ka jingdawa pyntreikam ILP ha Meghalaya namar naka liang u Myntri Rangbah ka jylla u khlem kren ia kane ka mat jingdawa ha ka jingialang ba wan u Myntri Rangbahduh bad u Myntri ka tnat kam pohïng ka ri India ha nongbah Shillong.
“Dei namar kane, ngim kwah iaka jinglong arsap ki nongmihkhmat namar haba phi long nongmihkhmat phim dei ban lehrain ban dawa naka bynta ka bha ka miat ki paidbah khamtam ban iada iaka jinglong tynrai hapoh ka jylla” ula ong.
