Shillong K’lyngkot 25: Ka Synjuk Waheh Shnong ka East Jaintia Hills District, kala rai ban buh noh da ki kyndon kiba pyrrkhing ia ki kyrtong bad ki political party ha kane ka elekshon MLA-2023 ha Jylla, ban lah wanrah ia ka elekshon kaba khuid kaba suba bad ba suk ba sain.
Ia kane ka rai la shim ha ka jingialang Executive Committee jong ka Synjuk kaba long myn ha ka 23 tarik Kyllalyngkot.
U President ka Synjuk ki Waheh Shnong EJHD Bah Hambertus Nongtdu bad u Secretary bah Jespar Bareh, kila pyntip ba ka Synjuk kala buh ia ka kyndon ba yn shah tang hapoh 15 tylli ki kali rit kynthup ka kali jong u Kyrtong uba iakhun Elekshon, ba kin leit ialap ialap elekshon ha kano kano ka shnong hapoh u pud u sam jong ka East Jaintia Hills District bad yn shah tang shisien ia u Kyrtong ban pynlong iaka Rally paidbah.
La pyrkhing ruh ba ka por ialap elekshon ka dei ban long katkum ka por ba la buh da ki bor sorkar ba dei peit bad ruh ba ym dei ban pynjakhlia pynjaboh ia ka sawdong sawkun ha ka por ialap elekshon bad yn ym shah ia kiba nabar shnong ban leit sha ka jaka ialap elekshon paidbah kaba u kyrtong u pynlong ha kano kano ka shnong, lait noh na ia ki nongbud jong u kiba la wanlang kiba don hapoh jong kitei ki 15 tylli ki kali rit bad ki trai shnong jong kato ka shnong ha kaba u kyrtong u leit pynlong ia ka jingialap elekshon.
Ka SWS-East Jaintia Hills District, ka kyrpad ia ka jingiatreilang jong ki Dorbar Shnong baroh hapoh jong ka East Jaintia Hills District ba kin sngewbha ban pyntreikam ia kitei ki kyndon ba la kdew haneng hapoh ki shnong ki thaw jong ki bad la kyrpad ruh ia baroh ki kyrtong ban iatreilang bad ka SWS-East Jaintia Hills District bad ki Dorbar Shnong da kaba bud ryntih ia kitei ki kyndon jong ka synjuk.
Ka SWS-East Jaintia Hills District kala dep iakynduh bad iakren sani bha bad u Deputy Commissioner jong ka East Jaintia Hills District bad ka seng kala kyntu ia u ban phah kloi kloi ia ki lad jingiarap ha kino kino ki por ba donkam kyrkieh jong kano kano ka shnong lane jong kino kino ki briew.
