Shillong, Risaw 06 : Ka Ri Nongtrai Sport & Social Welfare Association (RNS&SWA), kala ther tyngeh ia u Contractor halor ka jingkynnoh ba ula pyntrei torti ia ka surok na Mawshynrut sha Hahim, Athiabari kaba jrong kumba 37,646 Km.
Ha ka kyrwoh, kane ka seng kala ong ba une u contractor um pat long satia ban phah shna surok namar u dang iaid lait ia bun ki jingbthah kiba don hapoh ka Detailed Project Report (DPR).
Ka seng kala aiti ruh ia ka dorkhas sha u Chief Engineer ka PWD (Road), Shillong haba dawa ba dei ban tuklar mardor ia kane ka kam jong une u contractor.
Ha kane ka dorkhas,ka seng kala kdew ba ka jingpynheh ia ka surok na Mawshynrut sha Hahim, Athiabari ka dei kaba la pyntrei da u Bimal Kumar Agarwal bad ka kam, kam shym la iaid satia kat kum ka DPR.
U President ka RNS &SWA Bah D Diengngan, ula pynpaw ba ha ka jingjurip ia kane ka surok la shem ba bun ki kam kiba une u contractor ula pyntrei ki dei ki bym long kat kum ka DPR ba kynthup ia ka jingrben kajingsiang maw bad ka rong bad kiwei kiwei.
U Bah Diengngan ula ong ba ka seng kala lap ruh ba ka jingshna ia ka kynroh maw, ka guard wall, face wall jong ki Hume Pipe ki dei kiba synjor bha bad ka jingtah plastar ruh ka dei kaba shu leh tang dep.
U Bah Diengan u ong ba ka Seng kala kyrpad ban leh eiei pyrshah ia une u contractor ba un shna bha bad pynkhlain ia kane ka surok khnang ba kan long kaba skhem.
Ula pyntip ba u Chief Engineer (Roads) ula mynjur ban buddien ia kane ka kam bad kular ruh ba ka Tnad kan sa tuklar noh mar mar ia kane ka kam.
