Shillong, Risaw 06 : U Myntri bad Nongaiktien ka Sorkar Bah Paul Lyngdoh, ula pyntip ba ka Sorkar Jylla kala pynkhreh lut nadong hadong ban wan ialam noh ia ki nong Meghalaya kynthup ki samla pule ba sahkut ha Sikkim namar ka jingshlei um ba shyrkhei, kaba la shim ia bun ki mynsiem briew.
Haba iakren bad ki nongthoh khubor hynne ka sngi Thohdieng, u Bah Paul ula ong ba kat kum ka jingbthah jong ka Sorkar Meghalaya, ia ki samla pule la leit ban shaw noh bad yn wan ialam noh ia ki sha Jylla.
Ula ong ba tang ha kine ki ar-lai sngi ban wan, kane ka jingleit shaw ia la ki nongshongshnong kan dep pura noh.
Ha ka sngi Thohdieng mynstep, ka Sorkar Meghalaya kala shim mar mar ia ka sienjam ban ai jingiarap iala ki nonghongshnong kiba sahkut ha Sikkim. Kala buh ia u helpline number 1800-345-3644 ban ai jingiarap ia ki samla pule bad ki nong Meghalaya kiba donkam ia ki jingiarap namar kane ka jingjia ha Sikkim.
