SHILLONG, Nohprah 7: Ka Khasi Students’ Union (KSU) hynne ka sngi Balang kala ther tyngeh iaka Sorkar Pdeng halor ka jingbym lah ban shim rai ban pyntreikam ia ka Inner Line Permit (ILP) ha Meghalaya.
“Ka jingpynslem jong ka sorkar pdeng ban ai pyntreikam ILP bad ban ithuh noh iaka ktien Khasi bad Garo hapoh ka khyrnit ba phra ka riti synshar ka ri India kadei namar ka sorkar kam don mon” la ong u president ka KSU u bah Lambokstarwell Marngar haba kren sha ki lad pathai khubor hadien ka jingwan buh syntiew ha u mot u bah (L) Bull N Lyngdoh kum shi bynta ban kynmaw burom iaka lyngkhuh snem ba 28 snem ka jingkhlad jong u.
“Kane ka jingpynslem ka sorkar ka pyni ba ka sorkar pdeng kam burom iaka sur u paid trai jylla Meghalaya bad kam burom iaka Resolution jong ka ïingdorbar thaw ain ka jylla bala mynjur da baroh 60 ngut ki MLA ban pyntreikam ia ka ILP” ong u bah Lambokstar.
U bah Lambokstar u la kynnoh ruh ba ka sorkar Meghalaya ka tlot bor palat ha ka ban pynbor ia ka Sorkar Pdeng ba kan pyntreikam ia ka ILP.
“Ngim tip la ka Sorkar Meghalaya ka ju iakren ne em iaki mat ba dang sahteng bad ka sorkar pdeng ha ki por ba ki leit kynduh iaki Myntri ka Sorkar Pdeng ha Nongbah Delhi bad lada ki ju iakren kila dei ban kren noh kham jam khnang ba ka Sorkar Pdeng kan ioh sngew bad kan ai noh ka jingmynjur halor kine jingdawa” u la ong.
U la ong ba ka ïingdorbar thaw ain haka 19 tarik Nohprah 2029 kala mynjur daka Resolution ban dawa naka Sorkar Pdeng ba kan pyntreikam ia ka ILP naka bynta ban peitngor iaka jingwan rung kyrthlep ki bar jylla hapoh Meghalaya hynrei haduh mynta ka Sorkar Pdeng ka dang bishar sah ia kane ka jingdawa.
Haba pynrem ia kiwei ki sengsain pyrthei ba kam ba ka ILP kan pyntroin iaka ioh ka kot lyngba ka kam jngohkai pyrthei, u President ka KSU u la ong ba ka seng ka kwah ban ai ka kyrwoh ba donkam daka ain kaba khlain ban iada iaka jinglong kyrpang ki jaidbynriew ka jylla bad iaka jylla baroh kawei.
U bah Lambokstar u la ong ba kane ka dei tang ka buit aidaw ban ong ba ym lah ban pyntreikam ia ka ILP namar ka Meghalaya kadei ka khyrdop jong kiwei pat ki jylla.
“Lada don ka mon, kam don jingeh iaka Sorkar Pdeng ne Sokar Jylla ban pyntreikam ia ka ILP namar ka rukom pyntreikam iaka ILP ka iapher na kawei ka jylla sha kawei pat hynrei ban shu aidaw ba ym lah ban pyntreikam ia ka ILP namar ka Meghalaya kadei ka khyrdop sha kiwei ki jylla kadei ka bym lah satia ban pdiang” la ong u bah Lambokstar.
Une u Nongialam ka KSU u la ong ba lada ka Sorkar Pdeng kam lah ban pyntreikam ia ka ILP ha Meghalaya, balei pat ka pyntreikam ia ka ILP ha Manipur bad ha kiwei ki jylla ka thain shathie Lam Mihngi.
Halor ka Meghalaya Residents Safety and Security Act (MRSSA), une u Nongialam ka KSU u la ong ba watla ka Sorkar kala mynjur iaka MRSSA ha u snem 2016 hynrei ka long kaba sngewsih ba haduh mynta ka Sorkar Pdeng kam pat ai jingmynjur ban pyntreikam pura ia kane ka ain.
U bah Lambokstar u la ong ba ka long kaba lyngngoh, kum kino kita ki Nongialam ba ka Meghalaya ka don hapoh Secretariat namar wat ban pyntreikam iaka ain jong ka jylla ruh hap shim jingbit naka sorkar pdeng.
U la ong ba kila don kiba kwah ban pynjah iaka jingdawa pyntreikam ia ka ILP, MRSSA hynrei kum u nongialam ka seng barabor u ju pynsngew sha ki dkhot ka seng ba lada kito kiba don haka bor kim lah ban iada iaki paidbah, ki dkhot ka seng kin hap long ki nongiada iala ki para doh para snam.
Shuh shuh u la ong ba ka seng ka phah iaka kyrwoh kaba shai ba ka Sorkar Pdeng ne Sorkar Jylla kim dei ban kynnoh iaki samla lada ki mih sha ki surok ne madan ban iakhih naka bynta ban dawa pynurlong iaki mat ba ktah iaka bha ka miat ki paidbah bad ka jylla baroh kawei.
