Shillong, Nailur 29 : U Myntri Rangbah ka Jylla Conrad K Sangma hynne ka sngi palei ula ther kylla ia ka All India Trinamool Congress (AITC) bad ong “ban shu ong ba ka Sorkar ka khlem trei eiei bad baroh ki dei ki jingsynshar ka bym beit ka long kaba bakla palat”.
U Conrad ula kynthoh ia kane halor ki jingkynthah ba man ka sngi jong ka AITC kaba don ha ka Liang Pyrshah ia ka Sorkar Meghalaya Democratic Alliance (MDA) ba kam nang ban pyniaid ia ka synshar khaddar.
Haba iakren bad ki nongthoh khubor, u Conrad ula ong ba ki nongkynthoh kin ong beit ia kat kaba ki don ban ong hynrei ki nongkynthoh shimet bad ka Sorkar India lem bad kiwei kiwei ki Agency kiba khmih ia ki kam baroh, ki lah ban pynshisha ba kila don shibun ki jingkylla bad ki jingpynjanai ha ka rukom synshar khaddar bala iohi ha kine ki sawsnem shiteng.
“Katba ngi dang ong ba ngi khlem ong ba baroh ki dei kiba biang lut hynrei ki don shibun ki jingtynjuh bad ngi hap ban trei shitom…hynrei ban shu ong ba ym shym don jingkylla bad baroh ki iaid ha ka jingsynshar ka bym beit ka dei kaba bakla” ula ong.
Haba pynpaw ba ka dei ka kamram jong ka Liang Pyrshah ban pynmih ia ki jingkynnoh, u Conrad ula ong “lada phi peit ha baroh ki kam ba la leh, u soh uba la paw nga tharai ka pynpaw shai ba kila don shibun ki jingkylla kiba jia ha kine ki saw snem shiteng”.
Haba kdew ia ka jingpyllait paidbah ia ka School Upgradation programme ka ban pynbha bad maramot ki skul bala jot kum ka nuksa, u Myntri Rangbah ula ong “Phi iohi kumno ki iingskul ki long mynshuwa bad kumno ki long mynta. Ki don ki dur kiba ngim lah pyni mynta ka sngi, phin iohi ba ki la jot bha ha ki snem bala leit…Nga tharai kin don beit ki briew kiba kynthoh bad ngim lah ban pynsangeh ia kane hynrei nga sngew ba ki paidbah hi kila iohi ia kiei ki jait kam kiba iaid mynta ha ki Tnad bapher bapher ka Sorkar”.
“Nga la dep pynpaw ruh ba ngin sa ioh ia ka khusnam na ka President halor ka jinglah ban pyntreikam bha ia ka JJM ha ka 2 tarik Risaw kum ka jylla ba biang eh hapoh ka Ri. Kane ka dei ka sakhi bad ka nuksa ba kumno ka Sorkar Meghalaya kala treikam. Ngi la ioh ia kijuh ki sakhi ha ka kam jngohkai, e-governance, start-up programme bad kumjuh ruh ha ka tnad ka koit ka khiah” ula ong.
