Shillong, Naiwieng 09 : Ki kynhun Sengbhalang ba iakhih pyrshah mynder, ha ka sngi Palei kila ther tyngeh ia ka Sorkar Meghalaya Democratic Alliance (MDA) halor ka jingbym lah ban pynieng ia ki Entry &Exit Point, ki ban tehlakam ia ka jingwan rung kyrthep ki bar jylla bad mynder ri hapoh ka Jylla.
U President ka Khasi Students Union (KSU) samla Lambokstar Marngar haba iakren bad ki nongthoh khubor ula iathuh ba ki don haduh 18 tylli ki Entry &Exit Point kiba la tyrwa ban pynieng da ka Sorkar Jylla ha ka wat ba nyngkong kum shibynta ban pyntreikam ia ka Meghalaya Residents Safety and Security Act (MRSSA), 2016 hynrei baroh kila shu kut tang ha ki jingthoh namar ha madan hi ym pat don satia kawei ruh na kine ki khyrdop.
“Haduh mynta, ka Sorkar ka dang pynieng tang ia ka Umling Entry Point (Ri-Bhoi) kaba la kylla sah iingjah mynta. Ngim don jingtip shuh aiu ba long ba man ia ki 17 tylli ki Entry-Exit Point wat hadien bala dep ban sorjamin ia ki jaka ban thied” ula ong.
U samla Lambokstar ula ong ba kane ka pyni ba ka Sorkar Jylla kam kwah satia ban ioh bat ban breh ia ki mynder ri kiba wan rung shapoh ka Jylla. “Namar kata, ngi sheptieng ba lada ki mynder ri ki ioh ban wan rung suk sha Jylla, khlem pep shisien ka sngi kin sa knieh noh ia ka ioh ka kot bad ka hok synshar khadar jong ki paid riewlum” ula ong.
Ula ong, haman ka por ba ki leit ban buddien ia kane ka kam, ka Sorkar ka pynmih ia ki daw b aka MRSS (Amendment) Bill, 2020 bad kumjuh ruh ka Resolution jong ka Inner Line Permit bala mynjur da ka Iingdorbar Thaw Ain ka Jylla, ki dang sahkut hapoh ka jingbishar ka Sorkar Pdeng.
“Ha ka jingshisha, ngi la ai jingmut ia ka Sorkar Jylla ban pyntreikam shuwa ia ka MRSSA, 2016 shuwa ban wanrah ia ka Amendment ban nang pynkhlain shuh shuh ia ka ain hynrei ka Sorkar kala jam beit shakhmat ban pynbeit ia ka Ain kaba khlem pat pyntreikam” ong u samla Lambok.
Une u Nongialam ka KSU ula ong ba ka KSU dangshen kala leit iakynduh ia u Symbud Myntri Rangbah ba khmih ia ka Tnad Kam Pohiing Bah Prestone Tynsong, uba pyntip ba ka Sorkar Pdeng kala pynphai ia ka MRSSAB, 2020 ha ryngkat ki jingkylli pynshai.
“Hadien kane, ngi la iohi ba ka Sorkar kala pyrshang ban pyntreikam ia ka MRSSA ha ki 7 tylli ki Shnong” ula ong.
Une u Nongialam ka KSU ula kynnoh ruh ba ki District Task Force (DTF) ba khlieh da ki Deputy Commissioner bala thung kat kum ka Act, 2016 kila pyrshang ban iaid kiar ia ki Dorbar Shnong bad ong “Namar kata, ngi dawa ia ka Sorkar Jylla ban pynthikna ba ki Nongkitkam jong ki Dorbar Shnoong ki dei ban donkam ha ki DTF”.
Haba pynsngew ia kajuh ka sur, u President ka HNYF Bah Sadon K Blah ula ong ba ka Sorkar kala dei ban pyntreikam noh ia ki kyndon jong ka MRSSA.
“Ki don kumba 51 tylli ki Entry-Exit Point ha ka Jylla Meghalaya hynrei pat don kawei ruh kaban dep pynieng, kaba pyni ba ka Sorkar kam shym la shimkhia satia ha kaban iada ia ka Jylla n aka jingwan rung ki bar jylla bad ki mynder ri” ula ong.
U Bah Sadon ula ong ba ka Sorkar Jylla ka dei ban kren shai noh la kala rai ne kumno ban pynsangeh noh ia ki jingkular ban pynieng ia ki Entry-Exit Point.
