Shillong, Naiwieng 09: U Myntri ka tnat PHE u Marcuise Marak ula pyntip baka sorkar ka don jingthmu ban pynpoi kor um sha ki 5 lak tylli ki longïing hashuwa ka Khristmas 2023.
U Marcuise ula pyntip ba haduh mynta kila don palat 4 lak tylli ki longïing kiba la ioh um lyngba ka skhim Jal Jeevan Mission (JJM) ha Meghalaya.
Haba kren sha ki lad pathai khubor u Marcuise ula iathuh ba ka jingpyntrei iaka skhim JJM ha Meghalaya kala iaid bha ban ia nujor bad kiwei ki jylla hapoh ka Ri India namar baroh ki kam la pyndep haduh 62.12% ha baroh kawei ka Jylla.
“Ngi don ka thong ban poi kor um haduh 5 lak tylli ki tyllong ïing hapoh ka Khristmas 2023 namar katkum ka thong jong ka sorkar pdeng kadei ban pyndep ia kane ka skhim JJM hapoh u bnai Nohprah 2024” la ong u Marcuise.
Haba kylli haduh katno ka Jylla kala pynlut ban pynpoi kor um lyngba ka skhim JJM u Marcuise ula ong “Haduh mynta ka Jylla kala pynlut kumba T.3500 klur bad kane ka pisa kadei hi bala ai da ka sorkar pdeng ban pynthikna ba man ki tyllong ïing ki ioh kor um”.
U Marcuise ula ong ba ka Meghalaya kadei ka Jylla kaba la pyntrei bha iaka skhim JJM bad dei namar kane ka sorkar pdeng ruh kam shym la sangeh ban mang tyngka kham bun iaka Jylla.
Haba kylli halor ka jingkynnoh ba ki kor um ka JJM kim mih um, u Marcuise ula ong “Kane ka jingpyntip ba kila don 4400 tylli ki longïing kiba la ioh kor um kam dei ban shu ong u Myntri hynrei kadei kaba la pyntip bad pynbna daka tnat JJM bad baroh ki lah ban pynshisha ia katta”.
