Shillong, Iaiong 07 : Ki paid Muslim ha Shillong kila pynrem jur ia ka Waqf Amendment Act, kaba dang iatai dang shen ha Parliament bad ioh ia ka jingmynjur ka President Droupadi Murmu bad ong “ka dei ka sienjam ban pynlong ia ki paid Muslim kiba khlem jaka”.
Kila iasaid ruh b aka ain ym tang ba kam khein snep ia ka jinglong kyntang ki nongkynti ka Waqf hynrei ka iuhriot ruh ia ka hok tynrai jong ki Muslim ha India.
Kat kum ka jingong u General Secretary ka Shillong Muslim Union Noor Nongrum, ka kyndon kaba la pynkulmar bha ha katei ka ain ba la pynkylla ka dei ka kyndon kaba ailad ban shim biang ia ki jingdon jingem jong ka Waqf, kaba long ka jingpyrshah beit ia ka jingmut jong ka Waqf hi. “Ka Waqf hi ka dei ka jaka treikam ka niam… Shisien ba ka la long ka Waqf, ka long beit ka Waqf. Kam dei ka jingdon jingem ba la ai shano shano ruh…
Shisien lada nga leh ïa ka jingdon jingem jong nga kum ka Waqf, la ai sha U Allah bad ym shym la ïoh biang ïa ka. Ym lah ban shim biang ïa ka”ong u Nongrum.
“Kam dei kaei kaei ruh hynrei ka sienjam ban pynlong ia ki paid Muslim ba kin nym don jaka” ula ong.
U la ong shuh shuh ba katei ka ain ba la pynkylla ka pynkhein ia ka hok ba kongsan jong ki namar mynta donkam ban pynshisha ba u ne ka ki dei u Muslim. “Nga hap ban pynshisha sha ka sorkar bad ka sorkar kan rai la nga dei ne em uMuslim. Kumta, la shim noh ia ka hok tynrai jong nga”, u la ong.
Ka Shillong Muslim Union ha ka sngi U Blei ka la khot ia ka jingialang jong ki seng Muslim bapher bapher ban iakren ia ki jingjia ba dang shen ha kaba iadei bad ki jaka jong ki Waqf ha India, khamtam eh ia ka jingmynjur ia ka Waqf Amendment Bill ha baroh ar tylli ki iing dorbar jong ka Parliament.
U Bah Nongrum u la pynpaw ruh ia ka jingsngewsih halor kaei kaba u la batai kum ka jingpyntip bakla kaba la thmu da ka sorkar. U la kdew ba bun na ki kyndon ba la pyni kum kiba thymmai ki dei kiba la long lypa shi bynta jong ka rukom treikam kaba la don ha ka aiñ Waqf. U la pyntip ba ka hok ban tynjuh ia ki rai jong ka Waqf Tribunal ha High Court ka la don naduh mynshuwa, bad ka sorkar ka ialam bakla ia ki paidbah da kaba pyni ia kane kum ka jingpynkylla ain kaba thymmai.
U la buh jingkylli ruh halor ka jingpynlong ia ka Waqf Board, namar ba ka jingpynkylla thymmai ka ailad ia ki briew na kiwei pat ki niam ban long ki dkhot ha ka. U la ong ba kham mynshwa ruh ka board ka don ia ki dkhot Muslim ba la thung da ka sorkar na ki jaitbynriew bapher bapher, kynthup ia ki ophisar IAS bad ki dkhot kynthei. Watla u pdiang sngewbha ia ka kyndon thymmai halor ka jingpynlong ia ka Waqf Board, hynrei u la kynthoh ba ka dei ban long kaba kumjuh ia baroh bad dei ban shah ia ki Muslim ruh kum ki dkhot ka board ha ki Trust jong ki temple, ki iingmane, ne ki monasteries.
“Kumba u Myntri Rangbahduh baieid jong ngi u ong – kawei ka Ri, kawei ka ain. Kumta, ka dei ban don ha kiwei pat ki kynhun niam ruh. Kan long kaba sngewtynnad bha. Kum mynta u bym dei u Muslim u lah ban long u dkhot jong ka Waqf board. Kumta balei ngim don ruh ia u Muslim ha kiwei pat ki temple kum u dkhot jong ka Trust ne ha ka Balang. Baleiban don artylli-artylli ki ain haba u Myntri Rangbah Duh u ong Kawei ka Ri kawei ka Ain”.
Ha ka juh ka por u bah Nongrum u la pynpaw ia ka jingsngewnguh ia ki 238 ngut ki dkhot ka Parliament kiba la pyrshah ia kane ka bill, ha kaba kiba bun ki dei ki bym dei ki Muslim.
“Ki la iohsngew ia ka sur jong ngi. Kumta, naduh ka dohnud jong ngi, ngi kwah ban ai khublei ia ki. Ki la pyrshang katba lah ban pynsangeh (ia ka Amendment).”
