Shillong, Risaw 03 : Ka Myntri bad Nongaiktien ka sorkar jylla Kong Ampareen Lyngdoh ha ka sngi Palei kala kyntu ia ki nongkynthoh ba kim dei ban shu leh klet bad khein poh ia ki jingnoh synniang jong ki nongialam sain̈ pyrthei.
Kane ka jingkren kala mih hadien ba kala don ka jingkynthoh pyrshah halor ka jingthung ia ka MP barim ka Tura Agatha K Sangma, para u Myntri Rangbah ka jylla u Conrad K Sangma, kum ka Chairperson jongka Meghalaya State Commission for Protection of Child Rights (MSCPCR).
“Wat ym kynnoh ia ngi kumne. Kam long kaba iahap namar baroh ngi la trei shitom bha ban don ha ki kyrdan kiba ngi don”, ong ka kong Ampareen kaba dei ruh ka nongialam ka NPP haba kynthoh tyngeh halor katei ka mat.
Haba kynthoh tyngeh pyrshah ia kito kiba kynnoh ba ka jingthung ia ka Agatha ka dei ka jingthungkam tang iala ki bahaiing hasem, ka Myntri kala ong, “Phi mut kumno ba thungkam tang iala ki bahaiing? Hato ka jingtreikam kam dei kaba kongsan? Hato ka jingshemphang kam de kaba kongsan? Kaei de kaba phi kwah? Ka (Agatha) ka long ka briew kaba biang tam na ka bynta ka kam, lada phi kylli ia nga hi shimet”.
“Ngam kren na ka bynta jongngo jongno ruh. Nga kren kum ka nongialam sain pyrthei.
Lada ki don ki nongialam sain̈ pyrthei kumba don ka jingshemphang bad ba ih bha ha ka kam, kiba kloi ban bteng ban shakri ia u paidbah, haei kan don ka jingma. Hato kan pher aiu la ka dei ka para jongno re jongno ne ka khun jongno re jongno?.
Ka Kong Ampareen kala banjur ruh ia ka jingdonkam jong ki paidbah ba kidei ban peit ia ki politishian katkum ka jinglah bad jingtbit ka jong ki.
“Sngewbha peit ruh ia ki politishian ha ka jingtbit bad ia ka nongrim kaba ki ieng. Nga kyrpad ia ki paidbah ka Meghalaya ba phim dei ban long kiba khlem akor kumne. Hooid, ngi dei kiba mih na ki longiing sain pyrthei.Hato phin pynrem noh ia ngi man la ka por? Hato phi klet ia ka jingnoh synniang jong uta u politshian ia ka jylla bad hato baroh ngi long kiba biej bad ki bym don kyrdan ha ka jingtbit? Balei ngim long kiba biang? Sngewbha u don u pud halor kane ka jingiatai, ka jingleh shiliang khmat. Lada ki briew ha ka constituency ki jied ia u briew namar ba udei u khun ne ka lok ne u kurim jongu nongialam sain pyrthei, balei hato kadei ka jingeh?
“Balei phim ailad ia ka kynhun ha ka kam sainpyrthei ruh ba kin don iala ka jingim? Ngi ruh ngi dei ki briew, phi tip. Ngi don ruh ka thong bad ka jingangnud ban shakri ia ka jylla bad ki paidbah jong ka ri. Balei ba ki briew ki long khor bha ia ngi? Kane ka hap ban kut noh,” kala pynpaw.
