Shillong, Risaw 03 : Ka Hynniewtrep Youth Council (HYC) ha ka sngi Palei kala tyrwa ban ai kyllum lang noh ia ka bhah ba 93% sha baroh ki Scheduled Tribe jong ka Jylla ha ka State Reservation Policy ba thymmai.
Haba aiti ia ki jingai jingmut sha ka Expert Committee on State Reservation Policy ha ka Public Hearing ha Shillong, u President ka HYC Roykupar Synrem ula ong “Ngi don ka jingsngew ba lada pynshong nongrim na ka jingdon paid ki Khasi-Jaintia, ka bhah ka dei ban long 50% ia ki Khasi Jaintia, ki Garo ki dei ban ioh beit 40% bad kiwei ki ST ki dei ban ioh 3%. Da kawei pat ka jingpynbeit, ngi la ai jingmut ban ai kyllum lang noh da 93% ia baroh ki ST ka Jylla khnang ba kan don ka jingialeh hapdeng ki ST, 2 % ia ki SC bad 5% ia ka unreserved”.
U Bah Roukupar ula ong ba ka HYC ka sngew ba kane ka Job Reservation Policy ba mynta kam dei ia kaban pyntreikam lane pyniar ia ka jingai bhah haba pynrung sha ki jaka pule lane ban leit pule ia ki kyrdan ba shajrong shabar jong ka Jylla na ka bhah jong ka Jylla.
“Nalor kane, ngi don ka jingsngew ba ka Sorkar Jylla ka dei ban wanrah da la ka jong ka Ain kat kum ka Article 15(4) jong ka Riti Synshar ka Ri na ka bynta ban ai bhah haba pynrung klas sha ki jaka pule lane ban leit pule ia ki kyrdan bah eh shabar ka Jylla na ka bhah ka Sorkar” ula ong.
“Lada ka Sorkar ka thaw la ka jong ka ain ia kane, kumta ngi don ka jingsngew ba dei ban bud da ka jingai bhah kyllum lang ba 93% sha ki ST, 2% ia ki SC bad 5 ia ki Unreserve” ula bynrap.
Na ka bynta ki kam ba lait ha ki District, ka HYC ka sngew ba dei ban pynneh ia ka jingai bhah ba kyllum lang ia ki ST.
 ha ka sngi Palei kala tyrwa ban ai kyllum lang noh ia ka bhah ba 93% sha baroh ki Scheduled Tribe jong ka Jylla ha ka State Reservation Policy ba thymmai.){kind=link}