Shillong, Risaw 27: Ka seng Meghalaya United People’s Front (MUPF) kala kynnoh ba ki nongmihkhmat lane ki MLA ka thain Rilum Jaintia Hills, kim don ka jingiatylli ban pyrshah iaka jingthmu ka sorkar jylla ban pynpoi lynti rel hapoh ka thain
Haba kren sha ki lad pathai khubor u President ka MUPF Bah Dapoiwanmi Laloo, ula ong ba ka seng ka sngewkhia ban iohi ba ki nongmihkhmat lane MLA kynthup ki Myntri Sorkar naka thain Jaintia Hills kim pat long shai, haba iadei bad ka nongrim ba ki don halor ka lynti rel.
U Bah Dapoiwanmi ula ong “Naka por shaka por lyngba ki lad pathai khubor la iohi ba ki nongmihkhmat kim pat shai, kaei ka jingthmu lane ka agenda baka sorkar ka don naka bynta ban wanrah rel hapoh ka Jylla ne ha Rilum Jaintia Hills”.
Ula ong baka seng kam pyrshah iaki kam pynroi hapoh ka Rilum Jaintia hynrei kan nym shah iaka sorkar ban wanrah lynti rel khlem pat ioh shwa iaka Inner Line Permmit (ILP) bad kiwei kiwei ki lad jingiada naka jingwan kyrthlep ki bar jylla hapoh ka thain bad ka Jylla
“Ha jaka ban shim khia shwa ban wanrah iaki kam pynroi naka bynta ban kyntiew iaki nongshongshnong bad iaka thain, ki nongmihkhmat lane ki MLA ki bunkam ban pyrkhat halor ka lynti rel” ula kynnoh.
U Bah Dapoiwanmi ula ong ba ka seng kala dep ban buh daka dorkhas sha ka ophis Deputy Commissioner (DC) East Jaintia Hills ban phah sha u Myntri Rangbah ka jylla, kaba pynpaw ba ka seng bad ki paidbah ka thain Jaintia Hills kim pat pdiang satia iaka rel, la kadei ka rel kit mar ne kit briew kat bym pat don ki ain iada naka jingwan kyrthlep k bar jylla.
Ula kynnoh ba ka thain Jaintia Hills ka don markhap bad ka Jylla Assam bad ka Ri Bangladesh bad ka jingdon ka lynti rel kan pynshlur iaki briew ban wan buhai shnong hapoh ka thain.
“Shen ngin sa leit kynduh ia u Myntri Rangbah ban iakren halor kane namar haduh mynta kam pat long satia ban wanrah rel hapoh ka thain” ula ong.
