Guwahati, Risaw 27: U Myntri Rangbah ka Assam Himanta Biswa Sarma ha ka sngi Thohdieng, ula pynshai ba ki Nongtrei Sorkar kin ym lah satia ban iathoh shongkurim haduh arsien.
Haba iakren bad ki nongthoh khubor, u Himanta ula ong “Kane ka dei ka hukum kaba la rim kaba dei na ka bynta ki Nongtrei Sorkar ka Assam. Na ka mat jong ka service rule, un ym lah ban iathoh shongkurim arsien. Ngi la pyntreikam ia ka ain na ka bynta ki nongtrei Sorkar”.
“Hynrei wat lada don ki niam ki shah ban iathoh shongkurim arsien, ki nongtrei kin hap pan jingbit na ka Sorkar Jylla. Ka Sorkar Jylla ka lah ban ai jingbit ne lah ban nym ai” ong u Himanta.
Ula bynrap “Ngi la ju ioh pdiang ia bun ki case ba hadien ka jingkhlad noh u nongtrei, baroh ki kurim ki iakhun ban ioh ia ka bai bam tynmen. Ngi shem jingeh ban pynbeit ia kum kane ka kam. Mynta ruh ki don bun ki Thei Iap lok kiba la duh ia ka baibam tang namar ka jingiaknieh”.
“Ka hukum kala don naduh mynshuwa tangba ngi khlem pyntreikam ia ka hynrei mynta ngin pyntreikam pura noh” ula ong.
Ka Sorkar Jylla lyngba ka notification, kala pyntreikam ia ka hukum ba khang ban iathoh shongkurim arsien ia baroh ki nongtrei Sorkar. Kane ka long kat kum ka kyndon ong ka Rule 26 jong ka The Assam Civil Services (Conduct) Rules 1965.
Ia kane ka jingpynbna la pynmih da u Niraj Verma, Additional Chief Secretary ka Sorkar Assam ba khmih ia ka Tnad Personnel.
