Ther ka HYC ia u President ka BJP Youth Wing ba kynnoh phah siat ia ki nongiakhih

Shillong, Naitung 21: Ka Education Cell jong ka seng Hynniewtrep Youth’ Council (HYC) kala pynrem jur ia u President ka BJP Meghalaya Youth Wing halor ka jingkynnoh ba u phah siat ia ki samla pule ba iakhih kaba jai jai ha New Delhi.

Ha ka kyrwoh khubor ha ka sngi Baar, u Education Secretary ka HYC Bah Enlang Sawian ula ong ba ka don ka jing pynsngew ba dei ban shu siat ia ki nongiakhih bad kane kadei ka jingbyrngem kaba ktah jur ia ka jinglong kyrpang ka riti synshar ka ri.

“Lada ia katei ka jingpynsngew kadei kaba la pathai da ka jingshisha, kan ym dei satia tang ba kam don ia ka jingkitkhlieh, hynrei ka long kaba don jingma ban kynshoit ia ka jingiaumsnam bad ban thombor beit beit ia ka nongrim jong ka jingsynshar paitbah kumba la pynkup bor ha ka riti synshar ka ri” ula ong.

Ka seng kala pynpaw ba ka jingpynshlur ban pyndonkam da ka bor pyrshah ia ki nongshong shnong ban pyni ia ka hok ban iakhih ka long pyrshah ia ki kyndon jong ka rukom synshar paidbah.

“Da kaba iawer ban siat da ki kuli ha ka jaka ban don ka jingiakren da ka ktien jong ka jingleh thombor bad kam dei satia ka jingsynshar paidbah. Yn ym don uno uno u nongialam sain pyrthei, uba ha kano kano ka kyrdan ne nongrim, un don ia ka bor ban kynshoit ia ka jingiaumsnam pyrshah ia ki nongshong shnong kiba pyndonkam ia ka hok ka jongki” ula ong.

Ka Education Cell ka HYC kala banjur ba ia ka jingiakhih kaba jai jai dei ban iada hapoh jong ka Article 19 jong ka riti synshar ka ri bad ka byrngem ba kano kano ka jingthmu ban thom da ka bor kan long ka jingiuhroit ia ka aiñ.

“Ban pyrshah kam dei satia ka jingleh kam sniew. Ka jingpyrshang ban leh kam runar ne ban leh da kaba ia ka jingpynsngew katkum ka rukom synshar paitbah kadei kaba iaid katkum ki kyndon aiñ bad ka nongrim kaba la seng ia ka Republic ba kan ieng” la pynpaw ha ka kyrwoh.

Ka HYC kala dawa na ka BJP Meghalaya ban pynshai ia ka jinglong jingman jong ka halor katei ka mat, ban leh da kaba tyngeh pyrshah ia u nongialam samla bad ruh ban ai ia ka jingpan map na ki paitbah.

Kala kyntu ruh ia kiba pyntreikam ia ki aiñ bad ia ki bor kiba dei khmih ban peit bniah ba katei ka jingkynnoh kadei ne em kaba bakla, kynthup ia ka jingai ding ban don ia ka jingiaumsnam ne ban pynthud ia ki paitbah.

“Ka jingsngap jar bad ka jingbym leh eiei ia kum katei ka jingpynpaw, kan pynshlur ia kito kiba thmu ban tehlakam ia ka jingiaumsnam kum ki atiar jong ki kam sain pyrthei. Ym don uwei ruh u riewshimet, la udei uba pyniasoh bad kano kano ka seng sain pyrthei un long halor jong ka aiñ” la bynrap ka Education Cell jong ka HYC.