Shillong, Naitung 21 : Ka Iingkashari Supreme Court ha ka sngi Ba-ar kala hukum ia ka Sonam Raghuvanshi, kaba shah kynnoh pyniap iala u kurim ba wan honeymoon ha Sohra, ba kan rai la kan shu pyndem lane iakhun pyrshah ia ka jingmudui ka Sorkar Meghalaya ban khein duh noh ia ka jamin jongka.
Ka Kashari u Justice MM Sundresh bad PB Varale kala shong bishar ia ka jingkyrpad ka Jylla pyrshah ia ka hukum ka Iingkashari Meghalaya High Court ba ai jamin ia ka Sonam.
Ka Iingkashari kala tyrwa ia artylli ki lynti. Ka Sonam ka lah ban leit pyndem hi katba ka Iingkashari ba tian bishar ka dang lum jingthoh ia ki sakhi jong ki nongaisakhi lane ka Iingkashari kan shong bishar bad rai ia ka jingkyrpad jamin jong ka kat kum ka jinglong ka kam.
“La ngin pyrkhat bad pynmih ia ka hukum kat kum ka jinglong ka kam. Lane ngin pynmih ia ka hukum ia phi ban leit pyndem tad haduh ban da dep bishar ia ki nongai sakhi, hadien kane ngin sa iapeit ia ka. Ka lynti kaba ar ka kham biang ia phi. Shim ia ka jingbthah bad sa wan biang” ong ka Iingkashari.
Kala bynrap ba lada ka Sonam ka jied ban pyndem, kan sa bthah ia ka iingbishar ba tian bishar ba kan pynkloi ia ka jingkhmih bniah ia ki nongai sakhi bad sa shing pyrkhat biang ia ka aplikeshon pan jamin.
Ka Iingkashari Meghalaya High Court kala ai jamin hadien ka jingpynpaw ba ki kot ki sla ba kem ia ka Sonam ki kdew ia ka kyndon 403 jong ka BNS ha ka jaka jong ka kyndon 103 ba pyniap briew, bad ba ym shym la pyntip bha ia ki daw ka jingkem sha ka Sonam.
Ka Supreme Court kala buh jingkylli balei ba ia kane ka kam lah wanrah slem bad la kane ka jingbakla marwei kala biang eh ban ai jamin.
U Solicitor General Tushar Mehta, uba mihkhmat ia ka Meghalaya, ula pynpaw ia ka jingbakla ha ka rukom type bad ong ba ka Sonam ka tip bha ia ki daw ka jingkem.
U pyntip ba ka Sonam kala pyndem ialade tad hadien ba kem ia ki paralok ba iadonkti lang.
