Shillong, Naitung 21: Ka Meghalaya Pradesh Youth Congress (MPYC) ha ka sngi Baar, kala dawa ba dei ban leh da kaba tyngeh ia u nongialam ka BJP Youth Wing halor ka jingkynnoh ba ula kynthoh jur ia ka jingiakhih halor ka NEET ha Delhi bad ong, ba katei ka jingpynpaw ka jongu kadei kaba khlem akor bad ka jingleh ka bym don nongrim.
Haba iakren bad ki nongthoh khubor ha Shillong, u general secretary ka MPYC u Derrick Jyrwa ula ong ba utei u nongialam uba long u nongiasaid aiñ ula ai ia ka jingpynpaw kaba lam sha ka jingiaumsnam pyrshah ia ki samla pule kiba pynlong ia ka jingiakhih.
“Shaei ka nongrim ka jongu kum u Nongiasaid Aiñ? Kane ka jingleh ka jongu ka long kaei kaei kaba ym don satia ia ka kyrdan ha ka kam (unprofessional). Ngi pynrem jur ia u” ong u Bah Jyrwa.
“Ngi baroh ngi lah iohi ia kaei kaba jia hapoh Delhi. Ki samla kila shah shoh bad shah tied. Une uba na ka jylla Meghalaya uba pynmih ia kum katei ka jingsngew ka long kaei kaei kaba sngewlehrain bha. Phim lah ban ong, ba ki briew kiba pynlong ia ka jingiakhih dei ban pyniap noh ia ki” ula bynrap.
U Jyrwa ula ong ba katei ka rukom pynpaw ka pyni ia ka jingduna ban sngewthuh ia kaei kaei kaba suk tam bad ka pyni ruh ia ka jingduna jong ka seng BJP hi baroh kawei.
Ula kyntu ia ka seng ba kadei ban shim da ki sienjam bad dawa ba une u nongialam u dei ban hiar shuki noh.
Ha kaba iadei bad ka lynti jong ka aiñ, u Bah Jyrwa, “Ym ia mynta. Ngin sa ia shong pyrkhat ban leh ia kaban sa wan. Lada ka BJP kam leh eiei, ngi ngin iaid shakhmat ha kaban pynlong da ka jingiakhih.
U State Chief Organizer jongka Seva Dal u Bah Banphira Basaiawmoit ula ong ba katei ka jingpynpaw kadei kaba ym lah ban pdiang satia da baroh ki nongshong shnong ka ri.
“Kaei kaba une u briew ula pynsaphriang ha ka rynsan Social Media ka pyni shai kdar ia ka rukom leh jong ka BJP pyrshah ia ki samla. Ngi lah iohi ia ka jingleh ki pulit pyrshah ia ki samla ha Delhi. Ka jinglait tuh ki jingkylli kam dei satia ka kamkai. Ki samla pule bad ki longiing longsem ki jongki ha kylleng ki bynta jong ka ri, khamtam ha ki thain nongkyndong, kila kynshew da ka snem ia ka pisa ban pynkhreh ia ka eksamin” ong u Bah Basaiawmoit.
Ula ong, ba kane ka jingjia kadei ban pynkyndit bynriew kumno ki briew kiba don ha ka bor ki peit ia ki samla pule.
“Kane kam dei satia ka mat tang jong ka seng Congress. Kane kadei na ka bynta ka lawei jong ka imlang sahlang ka jong ngi. Ki samla pule kiba kwah long Doctor bad Engineer kila duh jingshaniah ha kane ka rukom treikam” la ong u Bah Basaiawmoit haba bynrap ba ka seng Congress bad ka Youth Congress kala kyrshan ia ka jingiakhih ki samla pule ha kine ki 2 bnai kiba la dep.
Ka MPYC kala pynbna ruh ban phah ia ka kynhun jong ki 4 ngut ki dkhot ban leit sha Delhi ha ka 22 tarik mynta u bnai.
“Ngin leit ban iakynduh ia ki nongialam ka seng, ki samla kiba pynlong ia ka jingiakhih bad kiwei kiwei kiba donbynta lang kynthup ia ki nongialam ka CJP. Ngin leit ruh ban iakynduh ia ki samla pule kiba la shah bom shah tied ha ka jingiakhih kaba la pynlong hynin ka sngi” ong u Bah Basaiawmoit.
“Ka jingthmu ka long ban pyni ba ki samla ka Meghalaya ki ieng ryngkat bad ki samla pule ha kylleng jong ka ri. Ngi ngin leit ym tang ka dak. Ngi kwah ban don ka rukom treiakm kaba khuid ba suba ha kaba ki samla pule kin ym shah iehnoh shadien” ula ong.
 ha ka sngi Baar, kala dawa ba dei ban leh da kaba tyngeh ia u nongialam ka BJP Youth Wing halor ka jingkynnoh ba ula kynthoh jur ia ka jingiakhih halor ka NEET ha Delhi bad ong, ba katei ka jingpynpaw ka jongu kadei kaba khlem akor bad ka jingleh ka bym don nongrim.){kind=link}