Dawa ka KSU ia ka NIT Meghalaya ban weng ia ki kyndon rung klas ki Samla Pule

Dei ka jingpynkhein ia ka hok tynrai ki samla pule

Shillong, Naitung 21 : Ka Khasi Students’ Union (KSU) kala thoh sha u Director ka National Institute Technology (NIT) Meghalaya, ba dawa ban wengnoh mardor ia ki katto katne ki kyndon ha ka ‘Declaration bad Undertaking Form’ haba kynnoh ba kane ka pynkhein ia ka hok tynrai jong ki samla pule.

Ha ka shithi, ka Seng kala pynpaw ia ka jingsngewkhia halor ki kyndon bala pynlong kongsan ha ka jingpynrung klas bad jingpynbteng ia ki jingpule kaba ka ong “ka jingbuh kyndon ba khlem nongrim bad ka bym iaid kat kum ka riti synshar ka ri”.

Ka KSU kala pyrshah kyrpad ia ka kyndon 4 jong ka Declaration kaba buh ba ki samla pule ki hap ban kot 100 % ka attendance ne shong klas bad aibor ia ka Institute ban shim ia ki jingpynshitom lada duna.

Ka seng kala iasaid ruh ba watla ka jinglong ryntih ha ka jingpule ka long kaba kongsan, ka jingbuh kyndon ia ka jingshongklas ka bym lah ban pynjynsur, kabym ailad haba pang ba shitom, haba iap, leh internship, leh research lane iashimbynta ha ki prokram ba iadei bad ka pule puthi kam long satia kaba lehhok bad bym shah liang.

Ka KSU kala pynpaw ruh ia kiwei ki kyndon kiba buh ba ki samla pule ki dei ban pynbna ba kim dei ban iashimbynta ha kino kino ki jingiakhih lane leit iasoh bad kino kino ki seng ne kynhun, haba maham ba ia ka jingrung klas lane jinglong samla pule lah ban pynduh noh lada pynkhein.

Ka KSU kala pynpaw ba kane ka dei ka jingpynkhein beit beit ia ka hok bala pynkup hapoh ka Articles 19(1)(a), 19(1)(b) bad 19(1)(c) jong ka riti synshar, kaba iada ia ka hok ban kren bad pynpaw, ka jingialum paidbah ba jai jai, bad ka hok ban thaw ia ki seng ne kynhun.

Ka KSU kala dawa ia ka NIT Meghalaya ba kan weng noh ia ka kyndon shong klas ba 100% bad bujli da ka policy kaba don jingmut kaba pynlait noh ia ki khep kiba dei hok.

Kala dawa ruh ba dei ban weng noh ia ka kyndon ba khang ban leit rung lane thaw ia ki seng ne kynhun bad ban pynshai ba tang ki kam ba long beain, kam thombor lane ki kam ba pynthut ki dei ban ngat ha ki jingpynshitom, ym ka jingiakhih kaba jai jai.