Agartala, Nailur 13 :U Myntri Rangbah (CM) barim ka Tripura, u Biplab Deb ula pyndep ia ka jingleit thep kyrteng kum u kyrtong jong ka seng BJP na ka bynta ka ilekshon MP shiteng samoi jong ka Rajya Sabha.
Une u CM barim ka Tripura ula aiti ia ki kot ki sla hakhmat u returning officer ha Agartala hynnin ka step sngi Nyngkong.
La synran lang ia u Biplab Deb da ki heh nongialam ka BJP kaba kynthup ia u CM ka Tripura, u Dr Manik Saha, u Symbud CM, u Jishnu Dev Varma, ka myntri khynnah ka sorkar pdeng ka Pratima Bhoumik, ka kynhun ki myntri ka jylla, ki MLA lem bad ki nongtrei ka party.
Ha kane ka ilekshon u CM barim ka Tripura, u Biplab Deb un iakhun pyrshah ia u kyrtong ka CPI-M, u Bhanu Lal Saha.
Ia kane ka ilekshon shiteng samoi na ka bynta ka Rajya Sabha seat ha Tripura la hap ban pynlong hadien ba u CM ka jylla u Dr Manik Saha ula pynsah thylli noh ia ka seat ha ka ba sdang jong une u snem.
Ia kane ka ilekshon shiteng samoi na ka bynta ka Rajya Sabha seat na Tripura yn pynlong ha ka 22 tarik mynta u bnai.
