Guwahati, Nailur 13: U heh shipai ba dei peit ia ka thain mihngi, u Lieutenant General Rana Pratap Kalita ula ong ba baroh ka jinglong jingman ha ki bynta khappud jong u Line of Actual Control (LAC) bad ka China ha ka thain mihngi ka long kaba iaid beit iaid ryntih bad kaba lah ban tehlakam.
U Lt Gen Kalita ula ong ruh ba ki shipai ka tnat Indian Army kila long kiba la pynkhreh ban ialeh pyrshah halor kino kino ki jingeh kiba lah ban mih ha ki jaka khappud bad ka China.
Ula ong ruh ba ka jingphai khmat jong ki shipai Indian Army ka long ban nang pynkhlain ia ki kam peitngor halor ki jingtreikam jong ka tnat shipai People’s Liberation Army (PLA) ka China hajan ki bynta khappud jong u LAC.
Une u nongialam shipai ula ong ba kane ka thain ka don hapdeng ka jingma hadien ki jingmih khubor jong ka jingiakynad hapdeng ki shipai ka India bad China ha ki bynta jong ka Demchok bad Depsang ha ka thain mihngi ka Ladakh.
Nalor kata ula ong ba ki bor shipai mynta ki long kiba la kham pynkhreh shuh shuh haba ia nujor bad ki por kiba la dep ha kane ka thain mihngi lyngba ka jingdon ia ki jingtei kiba la biang pura hajan khappud u LAC nalor ka jingpynrung ia kiba bun bah ki jait tiar iapom, kata kum ki drone, helicopter bad ki tiar jurip bniah.
Kane ka eastern theatre ka dei kaba kynthup ia ki jaka khappud hapoh u LAC kiba hap hapoh Sikkim bad Arunachal Pradesh bad ki bynta ba shakhmat ki don ia bun tylli ki jaka kiba kham shong syier, kata kum hapoh Tawang bad North Sikkim sector.
“Shah ia nga ba ngin pynthikna ba ka tnat shipai Indian Army kalong kaba la pynkhreh ban iakhun pyrshah lada mih kino kino ki jingeh ha kane ka thain mihngi.Ka mat kaba iadei bad ki kam khappud bad ka China la lah ban tehlakam ha baroh ki bynta khnang ban pynthikna ba kan ym mih kano kano ka jingiakynad,” ong u Lt Gen. Kalita.
Ia kane ula pynpaw ha ka jingiamir jingmut bad ka kynhun ki nongpathai khubor kiba la pynlong ka jingwan jurip sha Kibithu ha ka sngi Saitjain ba la lah, kata hadien ba ia ka ktem shipai ha kane ka jaka la ai ha ka kyrteng jong u hehduh shipai barim ka India u General Bipin Rawat uba la khlad noh na ka jinghap ka liengsuin helicopter ha ka 8 tarik u bnai Nohprah jong ka snem ba la dep.
Shuh shuh u Lt Gen. Kalita ula ong ba ki shipai India ki dang iai bteng ban bishar bniah halor ki jingtreikam jong ka tnat shipai PLA ha ki thain khappud jong u LAC bad longruh kiba la pynkhreh halor kino kino ki jingeh kiba lah ban mih.
Na ka liang ka India kala pynjur shuh shuh ia ki kam pynroi lyngba kiba bun ki jingtei ha lynter ki thain khappud jong u LAC, kata khamtam hadien ba kala mih ka jingiakynad ha ka thain mihngi ka Ladakh kaba la sdang naduh ka 5 tarik u Jymmang 2020.
