Imphal, Nailur 13: Ka Manasha Devi Sapam na ka sorbah Imphal kala ioh rah ia ka nam ‘Miss Manipur 2022’ ha ka jingiakop ba la pynlong ha ka sngi U Blei ba la lah, kata ha ka prokram kaba iphuh iphieng jong ka Manipur Trade and Expo Centre ha Imphal.
Ka Kongsangthei P Hurray na ka shnong Kachai hapoh Ukhrul bad ka Philayung Jajo na ka shnong Apong kaba hapoh Kamjong district kila wan ha ka kyrdan kaba ar bad kaba lai.
Da kane ka jingjop, ka Manasha mynta kala lah ban mihkhmat ia ka jylla Manipur ha ka jingiakop ‘Miss North East 2022’ ka ban sa long ha Nagaland ia kaba yn pynlong da ka Northeast Beauty Pageant Organisation (NEBPO).
Katei ka lahduh ha katei ka jingiakop ‘Miss Manipur 2022’ ba la pynlong ha ka sien kaba san kala ioh pdiang ruh ia ka khusnam kaba da ka song pisa kaba 1 lak tyngka. Katba ki arngut kiba bud kila ioh ia ka song pisa kaba T.80,000 bad T.60,000 hajar.
Ia kane ka jingiakop ‘Miss Manipur 2022’ ha ka sien kaba san la pynlong halor ka mat ‘Where Extraordinary is Created’.
