Shillong, Jymmang 30 : Ka Sorkar Meghalaya Democratic Alliance -2, kala thaw thymmai ia ka Committee jong baroh ki seng sain pyrthei ka Jylla, ka ban iakren halor ka jingpyntreikam ia ka Reservation Roster bad ka Reservayion Policy ka Jylla.
Kat kum ka jingpynbna bala pynmih da ka Tnad Political, la ai por ia kane ka Committee ba kan phah ia ki jingai jingmut hapoh shibnai sha ka Sorkar naduh ba pynmih ia kane ka jingpynbna.
U Chief Secretary ka Jylla Bah DP Wahlang ula pyntip ba ia kane ka Committee ba thymmai yn khlieh hi da ka Myntri ka tnad Ain Kong Ampareen Lyngdoh kum ka Chairperson.
Kane ka jingpynbna jong ka Sorkar kala mih ruh tang shisngi hadien ba ka Committee on Reservation Roster bala khlieh da ka Kong Ampareen, kaba shong jingialang ha ka sien ba nyngkong eh hynnin ka sngi Nyngkong, kala rai ban kyrpad ia ka Sorkar Jylla ba kan pyniar ia ka kti treikam jong ka Committee palat ia ka Roster System da kaba shah ne ailad ba kan iakren lang noh halor ka Job Reservation Policy.
Kane kala mih hadien ba ka Voice of the People Party (VPP), kaba don 4 ngut ki MLA, kala rai ban nym iadon bynta lang ha ka Committee tad haduh ba ka Sorkar ka mynjur ban iakren halor ka Job Reservation Policy.
Ki Dkhot jong kane ka Committee ba thymmai ki dei kiba mihkhmat na baroh ki seng sain pyrthei ka Jylla. Kine ki long u Zenith M Sangma-AITC, HM Shangpliang-BJP, Augustine Marak-GNC, KP Pangniang-HSPDP, Ronnie V Lyngdoh-INC, Pyndapborthiaw Saibon-KHNAM, Dr W Kharluki-NPP, Renikton L Tongkhar-UDP, Ardent M Basaiawmoit-VPP, Chief Secretary ka Jylla bad u Commission & Secretary ka Tad Political kum u Member Secretary.
U Chief Secretary u pyntip ba khnang ban ailad ia ka jingmihkhmat ba shonghok na baroh ki kynhun, ki Seng sain pyrthei ki lah ban phah mihkhmat sa mar arngut napdeng ki briew bala paw kyrteng ha ka jingpynbna.
La ong ba ka Committee ka lah ruh ban pynrung ruh ia kino kino ki dkhot ba kin iashim bynta ha ki jingialang jong ka Committee lada ka sngew donkam.
