Shillong, May 29: Ka Ladthalaboh kala mad iaka jingshah rem da kaba shah thep haduh 5-0 ha ka Niaw Wasa United ha ka jingiakahun haka Group B jongka Meghalaya State League kaba la long hynne ka sngi ha Kiang Nangbah Stadium.
Ha kiwei pat ki jingiakhun, ka Khliehmawlieh Youth Club kala pynliem iaka Wasa FC da 4-1 ha ka jingiakhun haka Group D kaba la long ha Tura, katba ha Mawkyrwat, ruh ka Riangdo kala pynrem iaka Lumdiengngan da 4-1 ha ka Group C.
Ka Langsning kala thaw iaka rekod ha ka MSL 2023 da kaba thep haduh 11 kol ia ka Seng Samla Laitryngew ha ka Group A kaba la long ha Shillong.
Ha ka jingiakhun ha Jowai, u Jeffree Surong jong ka ka Niaw Wasa ula thep 4 kol ha ka minit kaba 4, 7, 45+3 bad 70 katba u Owanijuh Pajuh ula thep iaka kol ha ka minit kaba 68.
Ka Ladthadlaboh kala ioh ia kalad bunsien ban thep kol hynrei kam shym la lah pat ban thep tang shi kol ruh, ka jingjop jong ka Niaw Wasa kan nang ai mynsiem iaka ba kan ialehkai bha shuh shuh ban ioh rung sha ka semifinal.
Ka Rangdajied United kala kamai 10 point bad ka dang hap ban ialehkai sa arsien hynrei ka Niaw Wasa bad ka Mulait United kila iakhaid mar 9 point.
Ha Mawkyrwat, ka Riangdo kaba la shah thep shi kol na sdang, kala lah ban pynrem ia ka Lumdiengngan da 4-1 kol ban wan ha ka kyrdan kaba lai haka Group C.
U Stepping Stone Wanshnong ula thep iaka kol naka bynta ka Lumdiengngan 36 minit hynrei tang hadien kato katne minit u Banshynshar Iawphniaw ula thep iaka kol haka minit kaba 40 bad u Sylvester Thongni ula thep ha ka minit kaba 41 bad ka Riangdo kala ioh ban tam da 2-1 ha ka kylla step.
U John Kerry Wanniang uba la mih bujli haka jaka u Thongni, ula ioh ban thep 2 kol ha ka minit kaba 49 bad 86 bad kane kala nang pynskhem iaka jingjop jongka Riangdo.
Ha ka jingiakhun ha Chandmari Ground Tura, ka Khliehmawlieh kala kamai 10 point da kaba pynliem da 4-1 ia ka Wasa FC.
Ha Shillong, u Dauruhipaia Pale jong ka Langsning ula ioh iaka Hat Trick da kaba thep iaka kol ha ka minit kaba 8, 83 bad 88 katba u Ambilstar Sun ruh ula ioh thep iaka Hat Trick ha ka minit kaba 29, 48 bad 50 minit.
Nalor kane u Kynsaibor Lhuid ula thep 2 kol haka minit kaba 18 bad 78, u Wilbert Marbaniang ula thep kol ha ka minit kaba 64 bad 90’+1 bad u Fedrick Wahlang ula thep ia ka kol ha ka 89 minit.
Ka jingiakhun lashai ka sngi ha ka Group B ha Jowai, kan long hapdeng ka Rangdajied United pyrshah iaka Mulait United ha ka por 2:30 mynsngi.
