Shillong Kyllalyngkot 06: U Kishan Lyngdoh ula thaw ia ka rekod kum u nongialehkai uba nyngkong eh na Meghalaya ban tied ia ka Double Century ne ban kamai 200 run tam ha ka Ranji Trophy bad ia kane ula tied hynne ka sngi Saitjain haka sngi baar jong ka jingiakhun pyrshah iaka Arunachal Pradesh ha Anand, Gujarat.
Katba u Ram Gurung, ula ioh ia ka Century ne kamai 100 run tam kaba dei ruh ka sien kaba nyngkong eh jong u Ram ban ialehkai ha ka Ranji Trophy.
Ka Meghalaya kala sangeh noh ban tied bad kala kamai 509 run bad hap 9 wiket bad kala tam da 410 run ia ka Arunachal Pradesh kaba la kamai tang 94 run ha ka jingleit tied ha ka sien kaba nyngkong.
Ka jingneh slem jong u Kishan uba long u Kapten ka Meghalaya badu Ram kala pynlong ban pynkamai iaka Meghalaya hauh 326 run, hynrei u Ram ula khyllem noh bad kamai 132 run, katba u Kishan ula bteng ban ialehkai bha.
U Kishan ha u snem ba la dep ha katei kajuh hi ka madan ialehkai, ula kamai ia ka Century ha ka Ranji Trophy hynrei mynta ka kynti pat ula nang ialehkai kham bha shuh shuh bad ula kamai 268 run na ka 308 bol.
U President ka Meghalaya Cricket Association u Nababrata Bhattacharjee ula iaroh ia kine ki ar ngut ki nongtied ka Meghalaya kiba la ialehkai bha.
“Ka jingkamai Double Century u Kishan Lyngdoh uba dei u kapten jong ka kynhun, kadei ka sien kaba nyngkong eh ia ka Meghalaya ha ka Ranji Trophy bad ngi sngewsarong halor kane ka jingjop une u nongialehkai ka jylla. U don ia ka jingtbit bad mynta ula ih bad shemphang bha bad ka jingiai shah ka jongu kala seisoh” ong u Naba.
Ula iaroh ruh ia u Ram uba la ioh ia ka Century ha ka jingmih madan ha ka sien kaba nyngkong eh ha ka Ranji Trophy bad ula ai khublei kyrpang ia u Ram bad ka jingjied ia u kam shym la long kaba bakla.
Hadien ba u Ram ula tied bha ula bteng pat ban kawang ia ka bol bad ula shim 1 wiket bad ai 11 run, katba u Dippu Ch Sangma ruh ula ioh ban shim 1 wiket.
Ka Arunachal kan donkam ban kamai sa 353 run ban pynlong ia ka Meghalaya ban tied biang sa shisien hynrei ka Meghalaya kan iakhun tyngeh ban pynhap dang kloi ia ki nongtied ka Arunachal.
