Shillong, Risaw 22 : U samla pule klas 9 ka Air Force Public School, Laitkor, Imingstar Mawlong, ula thaw ia ka record thymmai kum u rang ialehkai ba khynnah tam ban thep kol ha ka lympung ialehkai Shillong Sports Association (SSA) First Division League.
Ia kane la pynthikna da u General Secretary ka Shillong Sports Association Bah Dipshon L Nongbri.
Ha ka rta ba 15 snem, u Imingstar ula ioh thep ia ka kol ba pynjop ia ka Nongkseh Sports Socoal & Cultural Club ha ka sien jop kaba ar pyrshah ia ka Mylliem Sports Club ha ka sngi Nyngkong. Ka kol ba-ar ba u thep, kala pynlong ia ka Nongkseh ban jop da 2-1 kol bad ioh ban kamai lai point.
Ban paw kyrteng kum u nongthep kol ha ka First Division ka dei ka jingjop kaba khraw bha khamtam lei ban thaw syndon ia ka record kum u nongthep kol ba dang 15 snem, ka record ba ju bat da ki rang ialehkai kiba la kynjoh ia ka 19-20 snem ka rta.
Ia ka sap ialehkai u Imingstar la shem nyngkong da u President ka Nongkseh SS&CC ha ka jingialehkai phainal jong ka Meghalaya Youth League. U President Bah Daniel M Thangkhiew ula ong “Ka khyllipmat ba u (Imingstar) u ioh ia ka bol, nga tip ba ngi hap ban shim bad soi ia u”.
Ban soi ia u khlur ialehkai ba 15 snem kam dei ka kam kaba suk ia ka Nongkseh SS&CC, ong u General Secretary ka Club Bah Marbiang Thangkhiew uba hal ban pan jingbit ym tang na ki Kmie Kpa u Imingstar hynrei wat na ka skul ba kan shah ia u ban wan sha ki lympung kilan met bad iashimbynta ha ki jingiakhun.
Hashuwa ban iasoh bad ka Nongkseh SS&CC, u Imingstar ula ialehkai na ka Madan Laban SC ha ka SSA Forth Division, bad noh synniang shibun ha ka jingkiew kyrdan jong ka club sha ka Third Division.
 First Division League.Ia kane la pynthikna da u General Secretary ka Shillong Sports Association Bah Dipshon L Nongbri.){kind=link}