Shillong Nailar 01: Ka Sorkar jylla kala thaw ia ka Rationalization Committee ban khmih bniah ia ka jingtyrwa ban kyntiew bad pynbeit ia ka tulop jong baroh ki nongtrei ka Samagra Shiksha (Non-Academic) ha kane ka jylla, watla ki nongtrei kiba iakhih ki la rai ban bteng beit ia ka jingiakhih haduh ban da urlong ka jingdawa ban pynkiew tulop da 80%.
Ka jingpynbna bala thung ia ka komiti ba 20 ngut ki dkhot ka ban khlieh da u Commissioner & Secretary u Vijay Kumar Mantri – la aiti ruh da u Myntri Rangbah ka Jylla Conrad K Sangma sha ka kynhun jong ka All Meghalaya SSA Non Teaching Staffs Association (AMSSANTSA) ha ka jingialang kaba la long ha ka ophis treikam jongu, ha Secretariat, hynne ka sngi Palei.
Palat 1200 ngut ki nongtrei bym dei ki nonghikai hapoh ka SSA kila pynlong ïa ka jingïashong kyllain mungor ha madan Malki hadien ba kila kyntait ïa ka rai jong ka sorkar jylla ban pynkiew ïa ka tulop tang 25%. Ki nongtrei kiba pynlong ia ka jingiakhih, kila dawa ban pynkiew tulop da 80% ryngkat bad 2% katkum ka jinglong rangbah ha ka kam bad ban pynkiew 5% man la u snem.
Haba batai bniah shaphang ki 7 tylli ki kyndon treikam ka Committee, ka jingpynbna paidbah kaba la pynmih da ka tnad pule puthi kala ong, ba la aiti ha ka committee ba kan bishar bniah ia baroh ki jingtyrwa ba la ioh haduh mynta, kiba iadei bad ka jingpynkiew ia ka tulop jong baroh ki nongtrei ki bym dei ki nonghikai jong ka SSA.
Kala ong, ba ka committee kan pule bniah ia ki rukom siew jong kiwei pat kiba don ha ka jylla Meghalaya bad kan kdew ruh ia ki rukom siew ba la bud ha kiwei pat ki jaka pule kiba kum kine, nalor ba ka committee kan pule bniah bad ai jingmut ia ki sienjam ban pynduh ia baroh ki jingbym iahap ha ka rukom siew ha ki kyrdan ha kylleng ki District bad ki Block.
“Ka committee kan bishar ruh ïa ki jingtyrwa ba la ïoh ha kaba ïadei bad ka jingpynkiew man la u snem ïa kum kine ki nongtrei. Ka committee kan pyrkhat ruh ia ka jingjrong jong ka jingshakri ban pynbeit ia ka tulop. Ka committee kan ai ruh ia ki jingai jingmut kiba iadei bad ka jingpynbeit ryntih ia ki kam ha ki kyrdan bapher bapher. Ka committee kan pynthikna ba ïa ki kyndon bad ki jingbthah ba la pynmih da ka tnad pla tyngka na ka por sha ka por dei ban bud ryntih haba ka ai jingmut,” la bynrap ha ka jingpynbna paidbah.
Haba pdiang ïa ka rai jong ka sorkar, ka President ka AMSSANTSA ka Kong Jennyfer J Synrem kala ong, “Ngi don ka jingshaniah bad jingngeit ha u Myntri Rangbah jong ngi, uba dei u nongïalam uba tbit bha ba un leh ïa kane. Ka sorkar kam thied ia ka por namar balei ngin kyntait ïa kiwei pat ban kynthupl ang haba ngi dang ïoh lad ban pynthikna ïa ka jingsiew kaba mar katjuh na ka bynta ka jingtrei kaba mar katjuh ia baroh.”
“Hynrei ngin ym pynsangeh noh ïa ka jingïakhih kaba khlem buh por jong ngi, tad haduh ban da urlong ki jingdawa jong ngi khnang ba ngin ym donkam ban wan tied ïa ka jingkhang jong ka sorkar man la ka por,” ka la ong.
Ka President kala ong, ba u Myntri Rangbah u don ia ka jingthmu ban pyrkhat ia kaban pdiang ia katei ka jingdawa kaba la slem bha bad ka jingpynkiew tulop kaba la leh khatduh eh kadei ha u snem 2016.
Katkum ka jingong jongka, ka Association ka shaniah pura ha ka sorkar namar kane kan dei ka sien kaba nyngkong ba kan pynbeit ryntih ia ka rukom treikam.
Haba kylli ia ka daw ba kim shym la dawa ban pynkiew tulop ha ki 8 snem kiba la leit, ka Kong Synrem kala ong, “Haba phi trei shitom bha bad phim don por na ka bynta ka iing ka sem jong phi, thikna ba ngim don por na ka bynta ka pynlong ia ka jingiakhih, ngim sngewtynnad ïa ki jingïakhih namar ngi don shibun kiei kiei ban leh, shibun ki kam kiba la kynton, ngi hap ban ithuh ïa ki skul, ngi hap ban ai ïa ki lad jingïarap – ngi trei na ka bynta ki 9 lak ngut ki khynnah skul.”
Kala pyntip ba lashai ka sngi Thohdieng, ka committee kan sa shong ïa ka jingïalang kaba nyngkong ban ïakren halor kane ka kam.
 ha kane ka jylla,){kind=link}