Imphal, Jymmang 19 : U President ka Congress Mallikarjun Kharge ula thaw ia ka kynhun ‘Fact Finding’ ba lai ngut ki dkhot, ki ban leit sha Manipur ban ttohkit bad wad bniah ia ki daw ka jingkhie ka kam umsnam bad ka jingsapriang ka jingiakynad ha baroh kawei ka Jylla.
Ka Kynhun kan wad bniah ia ki daw ba sapriang ki kam pyntirem bad bishar ia u pud ba ka lah ban poi.
Kane ka kynhun ka kynthup ia u General Secretary ka AICC bad MP Mukul Wasnik, AICC ba khmih ia ka Tripura bad Sikkim bad Nagaland Dr Ajoy Kumar bad u MLA ka Tripura Sudip Roy Barman.
Kane ka kynhun kan wad bniah ia ka jinglong jingman ha Manipur ha ryngkat ka jingiatreilang bad u Heh AICC ba khmih ia ka Jylla Bhakta Chara Das, u President ka Jylla K Meghachandra Singh bad u MLA barim bad Nongialam ka Congress Legislature Party barim Okram Ibobi Singh.
Ka jingjia iaumsnam ba khie na ka jingiakynad pher jaidbynriew ha Manipur kaba la sdang naduh ka 3 tarik Jymmang, kala shim haduh 73 ngut ki mynsiem briew bad wanrah ia ka jingmynsaw jong palat 250 ngut kiwei pat.
