Tura, Jymmang 19 : Ka Meghalaya State Olympic Association (MSOA) kala tyrwa ban rah ia ka Meghalaya Games sha kylleng ki District kiba duna ha ka jingdon ki jingtei jong ki madan ialehkai khnang ba ka lympung kan long ka nongtynruh ban pynioh madan ialehkai ia kine ki District.
Ia kane la pyntip da u Working President ka MSOA Bah John F Kharshiing hadien ka jingialang bishar kam ha Tura, West Garo Hills ha ka jingiadonlang u Myntri ka Tnad ialehkai Bah Shakliar Warjri, ki Ophisar na ka Tnad Sports, ki Nongkitkam ka MSOA bad ki nongmihkhmat na palat 20 tylli ki synjuk ialehkai.
Ia kane ka jingialang la pynlong kum shibynta na ka jingpynkhreh ban leit jurip ia ki jaka ialehkai na ka bynta ka Meghalaya Games 2023 ka ban long ha Tura.
Ka Sorkar Meghalaya kala dep ban pynbna ban pynlong ia ka Meghalaya Games manla u snem. Mynta u snem, kane ka lympung ialehkai kan long ha Tura katba ha u snem 2024 kan long ha Jowai. U Myntri Rangbah ka Jylla Conrad K Sangma ula dep pynpaw ruh ia kane ha ka jingkren lamphrang halor ka mang tyngka ka Jylla, bad ban jur halor ka jingkongsan ban ai ka rynsan ia ki samla bad ban pynmih ia ki champion kiba lah ban leit iakhun ha ki National bad International Games.
U Bah John ula ong ba ka Meghalaya Games 2023 kan dei ka lympung kaba san bala pynlong bad kan don haduh 20 tylli ki jait jingialehkai ba kynthup ia ka archery, athletics, badminton, basketball, boxing, cycling, football, bad golf. Hynrei ka MSOA ka dang ap mynta ban ioh ia ka jingbit naka Golf Federation namar ka jingduna ki madan ialehkai golf.
Kiwei pat ki jingialehkai ki dei ka gymnastics, judo, karate, shooting, swimming, sport climbing, table tennis, lawn tennis, weightlifting, wrestling, bad wushu. Nalor kine, la tyrwa ruh ia ka Volleyball kum ka jingialehkai ba thymmai ha ka thup.
Haba leit bishar ia ki madan ialehkai, ka Kynhun kala leit jurip ia ka Rong Kong Swimming Pool bad ka Sorkar Jylla kala mynjur ban shna pynbha noh ia kane ka jaka jngi. Ka kynhun kala leit jurip ruh ia ka Inter State Bus Terminal (ISBT) ka ban long ka jaka sah jong ki nongialehkai kiban wan iashimbynta.
Kiwei ki madan bala hiar jurip ki dei ka madan ialehkai cricket, ka youth hostel bad ka Tura Indoor Hall, kiba lah ban pyndonkam ha kaban pynialehkai table tennis bad badminton. La hiar jurip ruh ia ka madan iakop mareh ha Tura (Tura Athletic Track) ha kane ka sngi.
