Shillong, Nailar 19: Hadien ka jingjop ia ka nam lahduh ha ka jingiakop niah kali kaba heh, u Jaden Rahman Pariat na Meghalaya, u la phaikhmat sha kawei pat ka lynnong ha ka jingiakop niah kali Formula.
U Jaden Rahman Pariat u la dep ban pynrung ïa ka kyrteng jong u ha ka histori jong ka jingïakop niah kali da kaba jop ïa ka lympung ïalehkai MRF Formula 2000. Ka jingïakhun kaba khatduh jong ka Indian National Car Racing Championship, kaba la long ha Madras International Circuit ha Chennai, ka la pynlong ïa u Pariat ban long u nongñiah kali ba nyngkong eh na ka dong mihngi jong ka Ri India ban rah ïa ka nam lahduh ba donburom.
Ha ka rta kaba 17 snem, u Pariat u la pyni ia ka jingtbit ba kyrpang jong u da kaba ioh ia ka jingjop kaba phra ha ki shiphew tylli ki jingiakop niah kali. Haba sdang na ka pole position, u la lah ban tam ïa kiwei pat ki nongïakop niah kali ban ïoh rah ïa ka trophy lahduh. Ka jingjop jong u ka long ka mawmer ba kongsan na ka bynta ka jingïakop niah kali jong ka ri India bad ka jingsarong kaba khraw na ka bynta ka jylla Meghalaya bad ka thaiñ shatei lam mihngi baroh kawei.
“Nga sngewkmen bad sngewnguh ia kane ka jingjop,” la ong u Jaden. “Ka jingtrei shitom, ryngkat bad ka jingkyrshan na ka longïing jong nga, ka kynhun jong nga, bad ki nongkyrshan, ka la pynurlong ïa kane kaei kaei baroh. Nga sngewkmen haduh katta katta bad nga khmih lynti ia ka jingiaid lynti kaba kham sngewtynnad nangne shakhmat.”
U Jaden u la sdang ïa ka jingniah kali ha u Nohprah 2020 bad ka MSport ha ka Meco FMSCI National Karting Championship. Nalor ka jingjop jong u dang shen, u la paw kyrteng kum u nongniah kali ba nyngkong eh na India ban ïoh ïa ka kiew ha ka rynsan F4 jong ka ri Bilat ha u snem 2023.
