Hap iakhun tyngeh ka India ban ioh rung sha ka World Cup 2027
Shillong, Rymphang 21: Ka Sanfida Nongrum na ka Jylla Meghalaya kala shah jied ha ka thup ialehkai Football jong ka kynhun ki 26 ngut ki nongialehkai ka ri India kaban iashimbynta ha ka AFC Women’s Asian Cup 2026 kaban long ha u bnai ban wan ha Australia.
Ka Sanfida kadei shi bynta ha ka kynhun ialehkai jong ka India kaba la leit sha Turkey ha u bnai Kyllalyngkot ban iashimbynta ha ki jingialehkai paralok pyrshah ia ki Club, kata 10 sngi shwa ba ka ri India kan leit sha Australia ban pynkhreh bha ban iakhun ha ka jingiakob.
Kala ioh ban mih ialehkai ha kitei ki jingialehkai paralok ia kaba ym shim la niew pat ia ki kum kita ki jingiakob ha ka kyrdan International hynrei kane ka samla na Meghalaya kala thaw ia ka histori ba kan ioh ialehkai ha ka Senior National Team ka ri.
Hynnin ka sngi, la pynbna ia ka kyrteng ka jong ka ha ka thup ialehkai jong ka ri da ka Coach Amelia Valverde. Ia ka Sanfida la khot ieid ruh da ka Polly, kadei kawei napdeng jong ki 6 ngut ki nongialehkai ki bym pat ju ioh ban mihkhmat ia ka ri bad kadei ruh napdeng ki 3 ngut ki nongialehkai kiba dang khynnah tam kiba don 20 snem ka rta.
U President jongka Meghalaya Football Association u Bah Hamletson Dohling ula pynpaw, ba ka long ka khyllipmat kaba sngewsarong bad ka histori ia ka jylla.
“Ka jingiaid lynti ka jong phi, ka jingtrei shitom bad ka jingngeit kaba skhem kala pynpoi ia phi shaduh shane. Phim rah eh tang ia ka lama jong ka ri hynrei ia ka jingkyrmen bad ia ka jingangnud jong kiba bun ki khynnah kynthei kiba don ha ka jylla, ia kaba mynta ki tip ba kane ka rynsan kadei kaba lah ban poi. Nga kitbok ba phin ioh ia ka bor, ka jingskhem jingmut bad ia ka jingiakob kaba phin iai sah kynmaw” la pynpaw u Bah Hamlet ia ka samla Sanfida.
Ka kynhun jong ka ri India kala don ha ka Group C bad kan sdang ia ka jingiakhun ka jongka pyrshah ia ka Vietnam ha ka 4 tarik u Lber ha Perth Rectangular Stadium ha ka por 4:30 janmiet katkum ka por ha ka ri India, hadien kane kan iakhun pyrshah ia ka Japan ha ka 7 tarik u Lber ha katei kajuh ka jaka bad kajuh ka por.
Ka jingiakhun kaba khatduh ha ka Group Stage kan long pyrshah ia ka Chinese Taipei (Taiwan) ha ka 10 tarik u Lber ha Western Sydney Stadium ha ka por 2:30 mynsngi katkum ka por ha ka ri India.
Ki artylli ki kynhun kiba khur bun point ryngkat bad ar tylli ki kynhun kaba wan balai kiba ialehkai bha ha ka Group kin ioh ban rung sha ka Quarterfinal. Ki 4 tylli ki kynhun kiba jop ha ka Quarterfinal kin ioh ban rung pat sha ka FIFA Women’s World Cup 2027 kaban long ha Brazil.
Ki kynhun kiba rem ha ka Quarterfinal kin ioh biang ia ka lad ban iakhun ha ka Playoffs ban iaknieh na ka bynta ki ar tylli ki jaka kiba dang lait kiba la bhah ia ka AFC sha ka World Cup. Ki ar tylli ki kynhun kiba rem ha ka Play-off kin ioh sa ia kawei ka lad ban ioh rung sha Brazil da kaba iakhun biang ia ka Playoff Tournament.
Na ka kynhun jong ki 26 ngut ki nongialehkai Football kynthei ka ri India, ki don 6 ngut ki nongialehkai ki bym pat ju mihkhmat ia ka ri kiba kynthup ia ka Sarita Yumnam, Sushmita Lepcha, Jasoda Munda, Sanfida, Aveka Singh bad ka Kaviya Pakkirisamy.
Ka Sanfida kala iarap ia ka Laitkor ban khur ia ka nam lahduh ha ka Women’s Football League 2024 bad ha u snem uba la dep, kala ialehkai na ka Misaka United, ha kaba kala long ka Top Scorer bad Player of the Tournament ha ka Karnataka Women’s League 2025-26.
Ka kynhun jong ka ri India
Goalkeepers: Panthoi Chanu Elangbam, Shreya Hooda, Sowmiya Narayanasamy
Defenders: Astam Oraon, Juli Kishan, Martina Thokchom, Nirmala Devi Phanjoubam, Sanju Yadav, Sarita Yumnam, Shilky Devi Hemam, Sushmita Lepcha, Sweety Devi Ngangbam
Midfielders: Anju Tamang, Aveka Singh, Babina Devi Lisham, Jasoda Munda, Sanfida Nongrum, Sangita Basfore
Forwards: Grace Dangmei, Kaviya Pakkirisamy, Lynda Kom Serto, Malavika P, Manisha Kalyan, Pyari Xaxa, Rimpa Haldar, Soumya Guguloth
Support Staff: Amelia Valverde (Head Coach), Crispin Chettri (Assistant Coach), Priya PV (Assistant Coach), Eli Ávila (Goalkeeping Coach), Mario Aguiar (Goalkeeping Coach), José Sánchez (Strength & Conditioning Coach)
