Shillong, K’lyngkot 10 : U Nongialam ka Liang Pyrshah bad Myntri Rangbah barim Mukul Sangma, ula ther tyngeh ia ka Sorkar MDA ba ialam da ka NPP halor ka jingkynnoh ba jam palat pud ia ka bor thaw ain da kaba tyrwa ia ka Amendment Bill jong ka Meghalaya Residents Safety and Security Act (MRSSA).
U Mukul ula kop ruh ia ka Sorkar ba kan thaw ia ka ain thymmai ban iada ia ka bha ka miat ki paidbah, lada ki don jing artatien ia ka jingtreikam jong ka MRSSA, 2016.
“Ka Amendment ba tyrwa ka Sorkar Jylla kala pulom, hynrei ka Principal Act (MRSSA) kam shym la pulom hynrei ki kwah ban pynkylla kaba iaid palat ia u pud thaw ain jong ki” ong u Mukul haba iakren bad ki nongthoh khubor ha ka sngi Saitjain.
“Ngi hap hapoh ka jingsynshar ka Sorkar Pdeng, ngim lah ban pynkylla ia kano kano ka sobjek kaba don ha ka thup jong ka Union list. Namar kata, haba ngi thaw ain, dei ban sngewthuh bha da ki nongthaw ia ka Bill kaba hadien lada mynjur da ka Iingdorbar Thawin kan kylla long ka Act hadien ka jingai jingmynjur jong u Lat. Shisien ba ngi iaid palat pud, ia kane ka bill hi yn hap ban phah sah ka Sorkar India namar phi lah jam palat pud, kumta u Lat um lah satia ban ai jingmynjur. Kane ka mut, ka Sorkar MDA ka don ia kawei pat ka jingthmu ha lyndet ban pynlong ia ka MRSSA 2016, ba kan ym treikam lane kwah ban buh ha ka duli pjah, kumta namar kane ka MRRSA kala kylla long ka bym lah ban pyntreikam dakane ka amendment bala tyrwa” ula ong.
Ula kynthoh jur ia ka jingbym ler thaw ain ka Sorkar bad ong “Nga la kdew ia ka Sorkar ha ka por ba leh ia kane ka kam hynrei kim shym la sngap ia nga, kim shym la sngap ia u briew ba don bynta ban thoh ia kane ka ain, ki mut ba ki dei ki nongthoh ba kham bit bad peit haei ka kut. Nga synei ia ka jingbym ler thaw ain jong ki”.
Une u Myntri Rangbah barim ula kynnoh ia ka Sorkar ba ka shu lamler sha ki paidbah halor ka facilitation centre da kaba ong “Ka High Court kala ong ba namar ka jingbym don ka kyndon treikam kaba biang, kane ka facilitation centre kam dei ban treikam. Ka dei ka kamram jong no ban pynkhreh bad ai ia kine ki kyndon treikam? Kumno ki facilitation centre ki dei ban treikam ka dei ka kam kaba hap ban pyniaid kat kum ki kyndon treikam. Ki (Sorkar) khlem leh ia la ka kamram, kila shukor ia ki paidbah, ta ka daw ba ym shym la lah ban pyntreikam ia ka MRSSA bad khatduh lah mih ki briew kiba rah ia ka MRRSA sha ka jingtian bishar ka Iingkashari hynrei ka MRSSA, 2016 kala ieng rasong hakhmat ka jingbishar ain hynrei dei ka amendment kaba iaid palat ia u pud thaw ain jong ka Sorkar ba ka MHA kala pynphai”.
Une u Nongialam ka Liang Pyrshah ula kyntait ruh ia ka jingkynnoh u Symbud Myntri Rangbah ka Jylla Bah Prestone Tynsong ba ong ba ka Sorkar barim ba ialam da u Mukul Sangma, kala leh ia kaba bakla eh da kaba shu pynrung ia ka kyndon Entry-Exit point tang ha ka rules ym ha ka Principal Act haba pynpaw ba dei kane ka jingleh bakla ba ka Iingkashari kala khang ban pynieng iaki Entry-Exit Point.
“Nga dei u nongthoh bad u (Prestone) ruh u dei u nongthoh ba donlang, u iadonlang ha ka por ba ngi iakren bad lada u kwah ban riehtngen ha kum kine ki jingbatai ba bakla, nga sngew synei ia u” kynthoh u Mukul.
Ula kynnoh ba u Bah Prestone ula thok ia ki paidbah da kaba ong “Ha kajuh ka por, nga la bitar bha namar ula shukor ia ki paidbah, kiba la jied ia u. Ula shukor ia ki paidbah ka Pynursla. Hato ki paidbah ka Pynursla kim don jingsngewkhia halor ka jingrung kyrthep ki mynder ri, ki sngewkhia, hooid”.
.){kind=link}