Nongpoh, Jymmang 05 : Ki runar ki bym lah ban tip ki dei kiei, kila rung jubor bad thang dusmon ia ki kamra klas jong kawei ka Iingskul ha Umsning kaba la tip da ka Umsning Town Dorbar Secondary School, kaba don ha Umsning Proper A.
Kane ka jingjia kala jia ha ka miet sngi U Blei ha ka por kumba 11 baje eiei, ong ka khubor haba suba jur ba kine ki runar kila rung na kyrpong shapoh kane ka skul bad kane kala mih hadien ba ki artylli ki kor CCTV bala pyndait da ka Shnong hakhmat ka khyrdop skul, kim shym la iohring satia ia ki briew ba wan rung tuh bad leh dusmon ia ka skul.
Kane ka jingleh dusmon kala wanrah ia ka jingduhong ia ki khynnah skul bad kumjuh ruh ia ka skul baroh kawei, haduh u pud ba ki nongpyniaid kila hap ban pynsangeh shuwa ia ka skul bad ai shuti ia ki khynnah namar katei ka jingjulor.
Haba kren sha ki lad pathai khubor, u Chairman ka School Managing Committee Bah Angelstar Khonghat, uba dei ruh u Rangbah Shnong ka Umsning Proper A, ula ong ba kane ka dei ka jingleh dusmon ym kaei kaei ruh. Ula ong ba kumno ki briew kin shu rung sha ki kamra klas bad thang dusmon ia ki kamra klas.
Une u Chairman ka SMC ula pyntip ba ha kine kiba la leit ruh, kala don ka jingshah leh dusmon ka iingskul hynrei na ka liang jong ka SMC kam shym la shimkhia satia naba ka dei ka jingjia kaba rit.
U pyntip ba na ka liang jong ka SMC kala leit ban ujor ejahar sha ki Pulit ka Umsning Police Station halor kane ka jingthang dusmon ia ka Iingskul.
Ka Principal ka skul Kong B.L Nonglait kala pynrem jur ia ki runar bad ong ba kane ka jingleh jong ki, ka dei ka jingleh dusmon ia ka pule puthi bad ia kane ka shlem kaba la ai jingnang jingstad ia ka dong bad ka thain Ri-Bhoi. Kala kyntu ia ki nongshongshnong ba kin long kiba husiar nangne shakhmat.
Ha kajuh ka por, ka SMC kala ai khublei ruh ia ki bor pulit ka Umsning Police Station kiba la kloi ban shimkhia ia kane ka kam bad ban wan jngoh ruh ia ka Iingskul kaba shah pynjulor.
