Nongpoh, Nailur 07: Ki Nongmihkhmat ka Ophis u Syiem ka Hima Jirang lem bad ki Sordar jong ki shnong bapher bapher kiba don ha ka synjuk ka Sur ki paidbah ka Western Ribhoi, kila thalain tyngeh ia u Sordar ka Patharkhmah halor ka jingkynnoh khlem nongrim ba u MLA ka Jirang ula lum sopsop ia ki kot ki sla na ka Hima Jirang bad Nongspung ban aiti sha ka sorkar Jylla na ka bynta ban iapynbeit ia u pud jong ka wat ba nyngkong.
Haba iakren bad ki nongthoh khubor, u Bah Langestar Wahlang, Asst Secretary ka Hima Jirang, ula ther tyngeh ia ka jingkren u Sordar ka Patharkhmah Bah Najim Kharmalki ba kynnoh pyrshah ia u MLA ha ka jingialang paidbah jong ka HYC dang shen.
“Kane ka jingkren ka dei tang ka jingpyn thohbria ia ka burom ka ijot jong u MLA, hynrei ka jingshisha hi ka long ba lada don mano mano ba donkam ia ki dulir khyndew jong ki shnong kiba hap hapoh ka Hima, ki Nongmihkhmat ka Hima ki ju pynlong ia ka jingialang bad ki ju buh jingthoh ha ki register bala pynkhreh kyrpang ia kane ka kam”.
Ki Sordar jong ki shnong bapher bapher ka Jirang Constituency kiba don hapoh ka shatri jong ka Sur ki Paidbah ka Western Ri-Bhoi ba kynthup ia u Bah Lestar Nongphlang Adviser Western Ri Bhoi Dorbar , Siewdor Syngkli, Sordar ka Mawskei Them, Liskonraw Nongtri Nongmihkhmat ka Women Social Welfare Patharkhmah, kila ong ba ki jingkynnoh jong u Sordar ka Patharkhmah ka dei kaba la kren na ka daw shimet khlem kano kano ka jingshisha.
Kila ong ruh ba k Jirang Constituency tang ha kine ki saw snem shiteng kala sakhi ia shibun ki kam pynroi bala wanrah da u MLA ia ka bym pat ju don satia ban leh da ki nongmihkhmat bala leit noh.
“Wat ka Patharkhmah Administrative Unit kala ioh ia ka jingithuh na ka sorkar Jylla ban kyntiew kyrdan noh sha ka Civil Sub Division namar ka jingtrei shitom bad ka jingtuklar jong u MLA”, kila ong.
