Shillong, Risaw 23 : Ka North East Indigenous People Forum (NEIPF) kala thalain da kaba tyngeh ia ka jingkren u Myntri ka Sorkar Pdeng Kiren Rijiju halor ka jingong ba ka Sorkar Pdeng kan hap shim ia ka rai jong baroh (collective decision) na ki nongshongshnong ka Jylla Meghalaya ban pyntreikam ia ka Inner Line Permit (ILP) ha Jylla.
U Rijiju ula kren ia kane ha ki nongthoh khubor shabar jong ka Rozgar Mela ba long hynnin ka sngi saitjain ha Polo. Une u Myntri ka Tnad Ain ula kren shai ba ka Sorkar India kan hap shim ia ka rai lang jong baroh halor ka jingpyntreikam ia ka ILP ha Jylla.
“Ka jingdawa ILP ka Meghalaya ka dei kaba la mynjur da ka Iingdorbar Thaw Ain ka Jylla ha kaba baroh 60 ngut ki MLA kila ai ka jingmynjur ia ka Resolution. Ki MLA ki dei kiba mihkhmat ia u paidbah jong ka Jylla baroh kawei” ong u Bah Wellbirth Rani, Chairman ka NEIPF haba iakren bad Ka Shlem.
Kat kum ka jingong jong u, “Kane ka jingkren jong u Rijiju ka dei kaba shu kren mutler bad ka pyni b aka dei beit tang ka jingbym don mon ban ai ILP ia ka Jylla Meghalaya.
“Kaei kata ka monlang u paidbah..Haba la mynjur da baroh ki MLA kiba mihkhmat ia u paidbah, sa kaei pat ba une u Myntri u kwah” ula ong.
Halor ka jingpyntip u Rijiju ba ka Sorkar India kan sa pynduh pyndam noh ia ki Ain bala thaw naduh ki por ba synshar ka Ri Bilat, u Bah Wellbirth ula ong ba ka Sorkar Pdeng kam dei ban pynduh ia ka ILP ne ka The Bengal Eastern Frontiers, Regulation 1873 namar kane ka dei ka ain kaba donkam ban ai jingiada ia ki paid riewlum ba rit paid.
“Ka Sorkar u Modi ka dei kaba ai ILP dang shen ia ka Manipur..ka NEIPF ka dawa ba kane ka Sorkar kan pyniar ruh ia ka jingtreikam jong kane ka Ain ha kiwei ki Jylla ki bym pat pyntreikam jong ka thain” ula ong.
Halor ka jingong ba ka Meghalaya ka donkam ban sei bun ki MLA na ka BJP ban lah pynurlong ia ki jingkwah bad jingangnud u paidbah haba shah kylli halor ka ILP, u Bah Wellbirth ula ong ba kane ka pynpaw shai kdar ba ka BJP ka kwah leh politics na ka jingdawa ILP jong ka Jylla Meghalaya.
“Mynta ba u dei u snem elekshon ha Jylla, ka BJP ka la pyni shai kdar b aka kwah ban shim kabu na kane ka ishu jong ka Jylla” ula ong.
U Bah Wellbirth ula ong “Ka jingdawa ILP jong ka Jylla Meghalaya ka dei kaba buh hakhmat ka Sorkar India bad ka jingiakren ILP ka long bad ka Sorkar bad ia ka Resolution ruh la phah sha ka Sorkar ym sha ka Ophis ka BJP”.
Ula ong ba ka bor ban pyntreikam ia ka ILP ka shong ha ka Sorkar India kaba synshar ia ka Ri.
