Tura, Lber 30: Ki paid riewngeit Catholic kila tep don burom noh ia ka Sr. Rosario Lopez Herraria hynne ka sngi Saitjaiñ ha St Xavier’s Convent Chapel, Tura.
Ka Sr. Rosario kaba la don 94 snem ka rta, kadei kaba na ka ri Spain bad kala khlad noh ha ka sngi Palei ha Nazareth Hospital, Shillong.
U Rt Rev. Bishop Andrew R Marak ula ialam iaka jingiaseng ha kaban leh burom khatduh ia ka Sr. Rosario ia kaba la wan ban iashimbynta da bun ngut ki briew na kylleng ki jaka bad kiba don ha ki kam ki bapher bapher.
Ka Sr Rosario kala pynlut da ki phew snem ha rilum Garo ban iarap kyrpang eh ia ki khynnah, ki rangbah bad ia ki longkmie bad la seng ruh ia kawei ka jaka kaba heh kaba long kyrpang naka bynta jongki, kaba la tip kum ka Bethany Society ha Tura.
Ka Sr Rosario kadei ruh ka dkhot jongka Missionaries of Christ Jesus (MCJ) bad kadei ka mishonary kaba la pawnam bha ha kylleng ka rilum Garo kaba la ialam ban tei ia ka iing naka bynta ki khynnah kiba don jingduna ha ka dkhot met bad ban ai iaki iaka jingnang jingstad kaba paka lyngba ka jingpyndonkam ia ka Braille bad Sign Language, katba ia ki rangbah bad ki longkmie la ai jinghikai ha ki kam thaiñ jingthaiñ bad ka kam rep kam riang kaban iarap ia ki ba kin khlain ha ka ioh ka kot.
Ka Sr Rosario kala ioh pdiang ruh ia ka Meghalaya’s Pa Togan Nengminja Award halor ki jingoh synniang ki jong ka sha ka imlang sahlang.
