Shillong, Rymphang 14 : Ka Hynniewtrep Achik National Movement (HANM)-Riwar Mihngi Circle, Pynursla, kala byrngem da kaba tyngeh ia u Sub Division Officer (SDO) ka Pynursla Civil Sub Division, ba un tehlakam noh ia ka kam khaii be-ain (smuggling) na thain Pynursla sha Bangladesh.
Kane ka jingbyrngem ka HANM kala mih halor ka jingjyllei ka kam khaii be-ain ia ki marbam mardih ba kynthup naduh ka shini, piat, phan, ktung bad ki masi ki muid sha Ri-Bangladesh, lyngba ka surok Pynursla-Dawki.
Kane ka Seng kala phaha da ka dorkhas sha u SDO ba maham ba lada ka Ophis kam leh eiei noh mardor, ka Seng kan mih bad shim hi noh da ki sienjam ba tyngeh nangne shakhmat ban iakhun pyrshah ia kane ka kam be-ain.
U President ka HANM Ri-War Mihngi ula ong “Ka jingpynkhaii beain ia kine ki marbam sha Bangladesh kala wanrah ia ka jingduna marbam mardih ha Jylla bad kane kan ktah pat ia ka dork a mur jong ki marbam. Haba khatduh dei u paidbah u ban mad ia ka jingeh na kane ka kam be-ain”.
U iathuh ba ki kali kit shini, kit marbam bad ki masi ki muid ki ju ieng da u lain naduh Laitlyngkot ter ter sha Pynursla hynrei ki bor ka ain ki shu peitkai ia kine ki kali. “Imat ka don kaei re kaei ha lyndet ka jingphai khmat lyndet ka ain” ula ong.
“Ki Pulit ki don ha Pynursla hynrei kim lah tehlakam. Ngi la ju pyntip bunsien sha ki Pulit ia kine ki kam beain hynrei mar dor kila kyntait ban leh eiei bad tynrong pynban ia ka jingkitkhlieh sha ka Tnad Custom” ula bynrap.
Une u Nongialam ka HANM u ong ba lada ka Ophis u SDO kam leh eiei noh, ka seng kam banse ban mih shakhmat bad ban leh da kaba tyngeh pyrshah ia kane ka kam.
