Agartala, K’lyngkot 21 :Da kaba pyntip ba ka Myntri Rangbah (CM) ka West Bengal ka Mamata Banerjee kan wan poi ha Tripura ha une u bnai Rymphang u ban wan, na ka liang u President ka Tripura Trinamool Congressu Pijush Kanti Biswas ha ka 20 tarik mynta u bnai u la kam ba tang ka party jong u ruh ka la biang ban pynrem ia ka BJP.
U Biswa ha ryngkat u Observer ka Trinamool Congress u Rajiv Banerjee, ka MP ka Sushmita Dev ha ka 20 tarik mynta u bnai ki la iakynduh ia u General Secretary ka All India Trinamool Congress u Abhishek Banerjee bad pynlong ka jingiamir jingmut ha kaba iadei bad ka jingpynkhreh ia ka ilekshon hapoh Tripura.
Kham hadien, haba kren sha ki lad pathai khubor, u Biswas u la ong; “Ka CPIM ka la synshar ia ka Tripura haduh 25 snem namar ka jingkyrshan jong ki katto katne ngut ki nongialam ka seng Congress.Mynta ki la iatreilang bad ka CPIM. Ka West Bengal ka la pyni ba tang ka Trinamool Congress marwei ka tip kumno ban iakhun pyrshah ia ka BJP. Lyngba kane ka juh ka rukom treikam ngin pyntreikam kumjuh ha Tripura.
Nalor kata u la pyntip ruh ba ki ilekshon shiteng samoi bad ki ilekshon assembly ki iapher shibun bad ha baroh kine ki artylli ki bynta ka rukom treikam ruh ka lah ban iapher.Kham hadien u la kam ruh ba dei tang ka Mamata Banerjee ka bor kaba lah ban pynrem ia ka BJP.”
“Ka Trinamool Congress kam donkam satia ia kano kano ka jingiateh lok na ka bynta ban pynrem ia ka BJP.Ka Trinamool ka ngeit ha ka polisi ‘Ekla Chalo’ (go alone lane iakhun marwei).Ki la don haduh shispah arphew tylli ki aplikeshon ba la phah kat haduh mynta na ka bynta ban ioh long ki kyrtong jong kane ka party hapoh kane ka iingdorbar assembly kaba don 60 ngut ki dkhot.Ia kine ki aplikeshon la jurip bniah da u chairman jong ka committee bad u president ka party ka jylla u Pijush Kanti Biswas.
Ha ka jingialang kaba la long ha ka sngi Thohdieng ba la lah, ia ka kaiphot kaba iadei bad ka jingbishar bniah la aiti noh sha u General Secretary ka All India Trinamool u Abhishek Banerjee. U Abhishek Banerjee ruh u lah ban wan sha Tripura mynta u bnai,” ong ute u nongialam ka Trinamool.
