Shillong, Risaw 16 : U Myntri Rangbah ka Jylla Conrad K Sangma ha ka sngi Palei ula pyntip ba ka Jylla Meghalaya ka dei tang ma ka ha ka thain Shatei lam Mihngi kaba kyrshan iaki skul shimet.
“Ngi pynlut T.1967 klu ha ka tulop ki nonghikai ba kynthup ia T.684 klur ia ki nonghikai skul Sorkar bad T.917 klur ia ki tulop ki nonghikai adhoc bad jingkyrshan lyngba ki grant in-aid. Ym don kiwei pat ki Jylla ha NE kiba kyrshan iaki skul shimet lyngba ki grant in-aid” ong u Conrad haba ai jingkren ha ka jingialang pynhap pyrda ia ka Platinum Jubilee Celebration ka Nongkrem Govt Upper Primary School ha Rast Khasi Hills.
Ula pyntip ruh ba ka Sorkar kala kyrshan palat 4000 tylli ki skul shimet ha Meghalaya lyngba ki grant in-aid.
“Ka jingmih na kine ki jingkynshew kam poi satia ha ka kyrdan kaba ngi kwah. Ka pisa kam dei ka jingsngewkhia, Hangno ba ngi iaid bakla?. Balei ngim lah ban kyntiew ia ka jingjanai ka pule dangle ha ki skul jong ngi?. Ngi la nang trei suki suki ban pynjanai ia ka. Katba ngi nang jam shakhmat, ngi dei ban ai jinghikai ia ki nonghikai jong ngi khnang ba kin lah pynbiang ia ki kyndon bala buh kum ki nonghikai bala biang kyrdan” ula ong.
U Conrad ula ai khublei ia ka skul halor ka jingiaid lynti ba la 75 snem, haba ai jingithuh ia ka synniang jong ki principal bala leit noh, ki nonghikai bad ki samla pule ha kaban pynwandur ia kane ka skul.
Ula ong ba ka jingkiew shakhmat jong ka Jylla ka shong eh ha ka jingdon ki nongshong shnong kiba bit ba biang nadong hadong.
Halor ki jingeh ba iakynduh ha ka kam pule dangle, u Myntri Rangbah ula kren halor ka jingkongsan ki jinghikai pyntbit ia ki nonghikai bad ka roi ka par ia baroh lang. Haba sot ia ka proverb ki China ula ong “Ka jingkynshew ha ki briew ka ai ia ka jingmyntoi kaba slem bha bad ka jingsaindur ia ki samla pule kan ai ka jingmyntoi kaban neh shirta”.
Halor ka jingdawa ban kyntiew kyrdan ia ka skul sha ka Secondary & Higher Secondary, ula pyntip ba ka Sorkar kan donkam ia ka jingiasyllok halor kane ka kam, haba kular ba kane ka skulk an ioh ia ka jingkyrshan ban sdang ia ka smart classroom bad ka computer room na ka Chief Minister Special Development Fund (CMSDF).
Ula pyntip ruh ba un sa ai ia ki tiar put tiar tem sha ki khynnah skulk a ban pynshlur ia ki ha ka put ka tem.
Ha kane ka sngi, u CM ula pyllait paidbah ruh ia ka souvenir jong ka platinum jubilee.
